Guwahati, ïaïong:
Ha kawei ka jingjia kaba pynkyndit, ki la don arngut ki briew kiba la shah kynnoh nongtuh ki la shah shoh haduh ban da ïap ha ki paidbhur ha ka thaiñ No. 1 Kathpara jong ka Rupahihat hadien ka jingthmu ban lute ha ka por miet.
Katkum ki khubor ba la ïohlum, la ïathuh ba ka kynhun jong ki riew sniew kiba don kumba 10-12 ngut eiei, ki la leit rung tuh shapoh ka ïing jong uwei u Mujjamil Haque Choudhury, ha ka por kumba 2 baje eiei mynstep.
Kine ki nongthombor, la ïathuh ba ki rah da ki tiar kiba nep, ki la teh ïa u trai ïing bad ki la byrngem ïa ka khun jong u kaba dang hynriew snem ka rta, da kaba buh ïa ka tiar pynmynsaw ha ka ryndang jong ka.
Kine ki runar ki la lute ïa ka pisa bad ki jingdeng ksiar kiba shongdor palat 4 lak tyngka na kane ka ïing. Hynrei katba ki dang pyrshang ban phet krad, ki nongshong shnong kiba la don ka jingsuba jur na ka jingpan jingïarap jong kine ki trai ïing, ki la leit sha katei ka jaka ba la jia ka jingjia.
Ki nongshong shnong ki la beh thong ïa ki runar bad ki la lah ban kem ïa saw ngut na ki.
Ha ka jingshah thombor jong ki paidbah kaba la bud, arngut na kine ki runar ki la shah bom shnong haduh ban da ïap. Uwei na kine kiba la ïap u dei uba la tip kyrteng kum u Safiullah, katba ïa uwei pat ym pat lah ban pynthikna haduh ba la thoh ïa ka khubor.
Ki arngut kiba la shah pynmynsaw ki dei kiba la tip kyrteng kum u Imanul Haque na Kadamguri bad u Rakib Uddin na Pub Larimukh.
Ha kane ka jingshah thombor, u trai ïing uba la tip kyrteng kum u Mujjamil Haque Choudhury u la mynsaw jur ha ka durkhmat.
Ki heh pulit kynthup ïa u Superintendent of Police ka district ki la poi sha katei ka jaka bad ki la sdang ruh ïa ka jingtohkit halor katei ka jingjia.
