Chandigarh, ïaïong:
Ki la don kumba katto katne tylli ki skul ha Chandigarh kiba la shah bthah ba ki la dei ban don ha ka jinghusiar bad ka jingpynkhreh ha ka lah sngi U Blei hadien ba ki la ïoh ïa ka khubor byrngem ban shah pynbthei bom lyngba ki email, ha kaba kane ka la pynlong ïa ki pulit ba kin pynkhlaiñ ïa ki jingkhynra.
Katkum ka jingïathuh ki heh pulit, la phah mardor ïa ki kynhun pulit sha ki skul kiba la shah ktah, ha kaba la pynlong ïa ka jingpeit bniah ha kylleng ki jaka.
“Ngi la poi sha ki skul tang mar ïa ïoh jingtip. Ka jingwad kaba bniah ka dang ïaid shakhmat, bad haduh ba la thoh ïa ka khubor ym shym la lap eiei kaba suba, la bthah ïa ki kmie ki kpa ba kim dei ban syier”, la ong uwei u heh pulit.
Katei ka jingjia, ka long hadien ba la mih ki jingbyrngem kiba kum kine, kiba la mih ha kine ki taïew ba ladep ha kylleng ka Punjab, Haryana bad Chandigarh. Ha kiba bun na kita ki mukotduma, kynthup ïa ki jingbyrngem ba la phah sha ki skul bad sha ka ïingbishar bahakhlieh duh jong ka Punjab bad Haryana, la pynthikna hadien ba ki jingmaham ki dei ki jingthok.
Ki bor pynïaid ki la ïathuh ba ka jingtohkit ka dang ïaid shakhmat ban lap ïa ka tynrai jong kitei ki email.
