Patna, ïaïong:
Kumba la pynbna da ka tyllong khubor, la ong ba u Nitish Kumar, un shim smai kum u MP jong ka Rajya Sabha, ha ka 10 tarik, Ïaïong bad u lah ban iehnoh ïa ka kam kum u Myntri Rangbah ka Bihar, tang hadien katto katne por ban ai ïa ka rai ban jied ïa uba dei ban shimti ïa ka kam jong u, kaba lah ban pynmih ïa ki jingïakren ban pynkylla ïa ki nongïalam ha ka ïylla.
Ka la don mynta lajan shi bnai hadien ba la pynbna ba u Nitish Kumar un hiar shuki kum u Myntri Rangbah ka Bihar, hadien arphew snem ba bud ba u la synshar, ka seng BJP ka dang hap ban rai ïa ka kyrteng jong u nongmihkhmat jong u.
Ka jingpynslem, la ong ki briew kiba don hapoh ka seng, ka dei namar ka jingbym ïaid shaphrang ha ka jingïakren.
Ka seng ka dang pynlong ïa ka jingïakren bad ki dkhot ba rangbah jong ka seng RSS, la ïathuh ki tyllong khubor jong ka seng, bad baroh ar tylli ki seng kim pat ïa mynjur lang ïa ka kyrteng ba la jied.
“Ka RSS ka wad ïa ka kyrteng kaba ym don jingïapher jingmut, kaba lah ban treikam laitluid na ka JD(U) hynrei kaba ym pynsngewsih ïa ki. Lait na kata, ka seng ka hap ban buh ïa u kyrtong uba ïadei bha hapoh ki jingpeit khmat ïapher jaitbynriew kiba don ha ka jingshah pynbna kyrteng,” ong ki nongïalam jong ka Unit ka seng ha ka jylla. Ka RSS ka don ha ka bynta kaba kongsan ha ka jylla.
U khun jong u Nitish u la shimti ïa ka kam kum u symbud Myntri Rangbah. Ym lah ban don sa uwei pat u Symbud Myntri Rangbah namar ba ka JDU kam kwah ban ïasam bor synshar ha ka shuki. Ka JD(U) kan pynrung 15 ngut ki myntri ha ka kynhun Myntri, katba ka Lok Janshakti Party kan don arngut ki Myntri.
Kiwei pat ki seng ba la ïatreilang kynthup ïa ka Hindustan Awam Morcha bad ka Rashtriya Lok Morcha kin ïoh mar uwei u Myntri.
Ki kam ba ïadei bad ka saiñ hima sima ka dang khih shane shatai na ka dang don kawei ka bynta ba la hap ban ai ïa ka rai, kaba la long da ki taïew haduh mynta.
U heh nongïalam jong ka seng JD(U) u Nitish Kumar un ym bat shuh ïa ka shuki Myntri Rangbah. Hynrei kumba long mynta, wat lada u la dep ban phah ïa ka shithi iehnohkam hynrei u dang ïai bteng ban bat ïa kane ka shuki.
Ki bor ba dei khmih ha ka kam saiñ pyrthei, ki la pynshai ba ka jingdon jong u ha kane ka shuki wat hadien ba u la iehnohkam ka long namar ba ka seng BJP kam pat lah ban ai ïa ka rai mano bad ïano la dei ban pynmih bujli ban shimti ïa ka kam jong u.
U Nitish Kumar, ha ka lah sngi U Blei, u la iehnoh ïa ka jinglong dkhot jong u ha ka ïingdorbar thaw aiñ jong ka Bihar, da kaba bud ryntih ïa ki kyndon jong ka Riti synshar ka ri, hadien ba ula shah jied ha ka ïingdorbar jong ka Rajya Sabbha, ha kaba sdang jong une u bnai.
Kane ka jingleh ka plie lynti thikna ïa ka jingkylla jong u sha ka Parliament, kaba pyni ïa ka jingkylla kaba khraw ha ka jingïaid lynti jong u ha ka saiñ pyrthei kaba la neh da ki phew snem, la ïathuh kawei na ki tnad pathai khubor.
Katkum ki kyndon jong ka Riti synshar ka ri, kino kino ki riew shimet, kiba shah jied sha ka ïing dorbar, ki dei ban iehnohkam, na ka kam nongthaw aiñ, kaba ki don mynta, hapoh 14 sngi.
Lada kim lah ban leh kumta, kan pynduh noh ïa ka jinglong dkhot thymmai jong ki, la ïathuh ka tyllong khubor.
Da kaba bud ryntih ïa kane ka kyndon, u Nitish Kumar u la aiti ïa ka jingiehnoh kam jong u ha ka 30 tarik u Lber.
Ïa ka shithi iehnoh kam la aiti thikna da u dkhot ka Legislature Council u Sanjay Gandhi na ka bynta jong u, ong ka khubor.
Ka jingiehnohkam ka pynkut noh ïa ka jingïadei kaba la slem bha jong u Nitish Kumar bad ka Dorbar Thaw Aiñ jong ka Bihar.
U la long nyngkong eh kum u dkhot jong ka ïingdorbar bahakhlieh duh ha u snem 2006 bad u la ïaid shakhmat ban shakri saw sien lynter kaba la neh haduh arphew snem, naduh u snem 2006 haduh u snem 2024, bad haduh ka samoi treikam jong u kaba mynta shwa ba un hiar shuki.
Naduh ba u shimti kum u Myntri Rangbah ka jylla ha u Naiwieng, 2005, u Nitish Kumar u la bat beit ïa katei ka kam katba u dang long u dkhot jong ka Legislature Council, ban ïa kaba ïakhun ïa ka elekshon sha ka Ïingdorbar Thawaiñ.
Kane ka rukom treikam ka la pynïapher ïa ka por synshar jong u na kiba bun kiwei pat ki nongïalam jylla.
Hashwa ba un shimti ïa ka kam ha ka Council, u Nitish Kumar u la shah jied kum u Dkhot ka ïïngdorbar thawaiñ na Harnaut ha u snem 1985.
U la shakri ruh kum u dkhot ka ïingdorbar thaw aiñ ha Lok Sabha, kaba la nang pynkhlaiñ shuh shuh ïa ka jingshemphang jong u ha kylleng ki rynsan thaw aiñ.
Ha kane ka por, un donkam ban ïoh ïa ka jinglong dkhot biang ha ka ïing dorbar thawaiñ ne ka Council lane ban wad ïa ka lad pynbeit saiñ pyrthei kaba pher.
Ka jingleit jong u Nitish Kumar sha ka Rajya Sabha ka pyni ïa ka jingsdang jong ka bynta kaba thymmai ha ka kam saiñ pyrthei jong u.
