Agartala, ïaïong:
Ka jingïakynad ka la nangjur hashwa ka elekshon sha ka Tripura Tribal Areas Autonomous District Council (TTAADC) hadien ba la kynnoh ba ka ophis elekshon jong ka BJP ka la shah thang bad ym duna ïa ka 10 ngut ki nongbud ka seng kynthup ïa uwei u kyrtong ki la mynsaw ha ki jingjia bapher bapher ha Sepahijala distrik ha ka 5 tarik. Ïaïong.
Katkum ka jingïathuh ki nongïalam ka BJP, u kyrtong jong ka seng na
Pekurjala Janmejoynagar konstitwensi u Majee Debbarma u la mynsaw na ka khlieh ha ka jingïalap elekshon haman ki thliew ïing. La ïathuh ba katei ka jingshah thombor ka la jia ha ka por ba ka kynhun ki nongleh kam sniew ki la ïaleh pyrshah ïa ki nongbud jong ka seng, ki la pynjulor ïa ki kali, bad ki la thombor ïa ki.
Ka Sepahijala Sabhadhipati Supria Das Datta ka la kynnoh ba kitei ki nongthombor ki dei kiba la kyrshan da ka Party Tipra Motha, da kaba kynnoh ba katei ka jingkulmar ka dei kaba la mih na ka jingpynkynriah ïa ka jingkyrshan paidbah sha ka seng BJP. “Ki briew ki rung bun sha ka BJP, bad dei na kata ka daw ba kum kitei ki jingshah thombor ki mih.Ngi pynrem jur ïa kane”, la ong ka Datta.
Ha kawei pat ka jingjia, u Myntri ka Tripura Panchayat, u Kishor Barman, u la kam ba kawei ka ophis elekshon jong ka seng BJP, kaba don ha Nalchar Assembly konstitwensi, ka la shah thang ha ka por janmiet. U la ong ba ki nongbud jong ka seng ki la ïoh phone ban pyntip ïa ki shaphang katei ka jingpluh, kaba la kynnoh ba la thang da ki riew sniew.
U Barman u la kynnoh shuh shuh ba kumba 8 haduh 9 ngut ki nongbud ka BJP ki la mynsaw ha ki jingshah thombor bad mynta ki dang shah sumar. U la kynnoh ba ki nongkyrshan jong ka Tipra Motha ki la pyndonkam da ki dieng bad ki nar ha ka por ba thombor bad u la khot ïa kine ki jingjia kum ka jingbteng jong ka jingshah thombor ha ka saiñ pyrthei ha ka jylla.
“Ka BJP kam ngeit ha ka kam thombor, hynrei kum kine ki kam kim lah ban khanglad ïa ngi ban jop.Ngi pynrem jur ïa kane ka jingshah thombor,” u la bynrap.
Halor kine ki jingkynnoh ka Seng Tipra Motha kam pat ai kano kano ka jubab kaba shai. Ha kajuh ka por, ki jingeh ha ka liang ka jingshngaiñ ki la nang jur namar ba ka jingïalap elekshon ka dang ïaid shakhmat ha ka por ba dang ïaid shakhmat ka elekshon TTAADC.
