Guwahati, ïaïong:
Katto katne tylli ki longïing kiba la shah pynkynriah na ka jingshlei um ha Bongaigaon distrik jong ka Assam ki dang sah khlem lah ai rai ïano ban kyrshan ha ka elekshon sha ka Ïingdorbar Thawaiñ ha ka 9 tarik Ïaïong, u Risaw.
Ki nongshong shnong kiba la shah ktah ki dei na ka shnong Jaraguri kaba hap hapoh ka Bongaigaon Assembly konstitwensi.
Ka jingbym thikna jong ki ka pynpaw ïa ki snem jong ka jingeh hadien ka jingshlei um kaba shyrkhei jong u snem 2019, ha kaba ka wah Aie ka la rong noh ïa ki ïing ki sem jong kumba 75 tylli ki longïing kiba la saphriang ha ki jaka kiba jan 500 bigha.
Na kine, tang 26 tylli ki longïing ki dang bteng ban sah ha ki jaka sorkar hapoh shnong kum ki longïing kiba la shah pynkynriah na ka jingshlei um.
Ki longïing kiba dang sah ki la leit sah shawei pat ban wad jaka sah bad jaka kamai, da kaba kdew ba
Napdeng kito kiba sahkut, 13 tylli ki longïing la ai ïa ki ïing sorkar kiba heh 16 x 16 phut. Hynrei ki jingtei ki dang sahkut bad kim don ki jingdonkam ba kongsan kum ka bording, ki paiñkhana, bad ka lad ban ïoh ïa ka um dih kaba khuid.
“Ngim lah ban shong ha kine ki ïing bad kiba ha ïing ha sem, kam don bording, kumta ki khun jong ngi ki pule da ka jingshai jong ki mombati, ha ka por Lyiur ngi hap ban shong hapoh ki dieng” ong u Aduri Arya (40 snem ka rta), uwei na ki nongshong shnong.
Da ka jingduna ki lad kamai nalor ka jingtrei ba man ka sngi, ki nongshong shnong ki ong ba ki dang ïaleh ban ïoh ïa ka jingsumar pang, ka jingpynbiang bam, ka bording, ka um kaba khuid, ki kot ki sla jong ka jaka, bad ki skhim jingïarap jong ka sorkar.
“Ngi donkam eh ïa ka jaka kaba neh bad ka lad kamai kaba shngaiñ khnang ba ngin lah ban pynneh ïa ka jingim jong ngi”, la ong u Bipin Chandra Arya (57). Bun na ki longïing kiba shah ktah mynshwa ki la kyrshan ïa ka Asom Gana Parishad (AGP), hynrei ki ong ba mynta ki dang bishar bniah biang ïa ki rukom jied nongmihkhmat ha ka saiñ pyrthei.
“Ngin sa shong lang shwa ka jingthep vote ha ka 9 tarik u Ïaïong bad ngin rai ïano ban kyrshan,” ong ka Tara Chandra Arya (76). Katba ka jingthep vote ka nang jan, ka rai jong ki ka lah ban shong ha kano ka seng ne u kyrtong uba ai ïa ki jingpynthikna kiba lah ban ngeit halor ka jingpynbha pat, ki jingshakri ba kongsan, bad ka jingïada kaba neh.
