New Delhi, Nailur:
Ka kynhun Enforcement Directorate (ED) ha ka sngi Balang ka la pynlong ïa ka jingtalasi bad kurup ha ki jaka bapher bapher ha Kolkata bad Indore ha Madhya Pradesh ha kaba ïadei bad ka jingtohkit ïa ka pisa kaba ïadei bad ka jingkynnoh thok ha ka kam bei tyngka ha kaba bun ki nongbei tyngka ki la shah thok.
Ka jingtalasi ka dang ïaid shakhmat, kaba kynthup ïa ki jaka jong ki suba donkti ba kynthup ïa u KC Dujari, Kali Kishore Bagchi bad kiwei kiwei kiba don jingïadei bad ka Amrit Group jong ki kompeni, la ïathuh ki heh sorkar.
Ka Kolkata Zone jong ka ED ka la sdang ha kajuh ka por ïa ka jingkhynra katkum ka kyndon 17 jong ka aiñ ïada ïa ka jingpyndonkam ïa ka pisa (PMLA) ha ka jingïatreilang bad ki bor pahara bad ki pulit ka jylla.
Ka Amrit Group jong ki kompeni bad ki Director jong ka ki shah kynnoh ba ki lum pisa shibun na ki paidbah ha ka jingtap jong ki skhim thep pisa bapher bapher ryngkat ka jingkular ban ïoh pisa kaba heh bad thok ïa ki paidbah da kaba kim siew biang ïa ka pisa ba la kular.
Ka tnad sorkar pdeng ka dang bishar bniah ïa ki kam jong ka Amrit Group jong ki kompeni bad ki nongpynïaid jong ka halor ki jingkynnoh ba ki la lum pisa shibun na ki dkhot jong ki paidbah lyngba ki skhim thep pisa bapher bapher da kaba kular ban ïoh ïa ka jingmih kaba heh.
Ha ka jingtalasi, ki heh jong ka ED ki dang bishar bniah ïa ki kot ki sla bad kiwei kiwei ki tiar kiba don ha katei ka jaka ban lap ïa ka jingïaid jong ka pisa bad ban buh ïa ka lynti ïaid jong ka pisa, la ong ki heh.
Ka jingleh jingkam jong ka kynhun ED hapoh ka PMLA ka long hadien ba ka tnad ka la bishar bniah ïa ka jingkynnoh ba la lum pisa na ki paidbah bad hadien kata ka jingpynïaid ïa kita ki pisa da ki kynhun bad ki riew shimet kiba don jingïadei bad katei ka kynhun.
Ki jingtalasi ki long ban lum ïa ki kot ki sla bad kiwei kiwei ki sakhi kiba ïadei bad ki jingkynnoh ba la pyntreikam pisa, ka bynta jong ki Director bad ki nongpynmih, bad ka jingleit jingwan jong ka pisa, la ong ki heh sorkar.
La khmih lynti ruh ba ka tnad kan bishar bniah ïa ki kot ki sla jong ki kompeni bad ki briew kiba ïadei bad ki ban tip haduh katno ka jingheh jong ki jingleh be-aiñ ha ka liang ka pisa tyngka ba la kynnoh bad ban ithuh ïa ki mar ki mata, lada don, kiba ïadei bad ki jingmih ba la suba na ka kam runar.
