Imphal, Nailur:
Ka jingkulmar ka la mih ha ka District Kangpokpi jong ka Manipur hadien ba ki bor pahara ki la shah kem ym duna ïa ka 6 ngut ki briew na ka shnong Kholep (West Haipi) kaba don hajan ka shnong Chawangkining jong kane kajuh ka distrik ha ka 19 tarik Nailur.
Katkum ki khubor ba la ïohlum, la ïathuh ba ka kynhun jong ka CoBRA CRPF unit ka la kem ïa 6 ngut ki briew kiba la suba ba ki dei ki dkhot jong ka kynhun lehnoh kieng atiar ha ka 19 tarik, Nailur hajan ka shnong Chawangkining, Kangpokpi distrik jong ka jylla Manipur.
Ki briew kiba la shah kem ki dei kiba la tip kyrteng kum u Seilet, u Manglen, u Satho, u Lenlal, u Gin bad u Chuchung, ong ka khubor na ki nongshong shnong.
Hadien katei ka jingjia, ki kynthei ba bun bad kiwei kiwei ki la hiar thma sha ka shnong Chawangkining ban dawa ban pyllait khlem jingeh ïa ki briew kiba la shah kem. Hynrei la khanglad ïa ki da ki bor pahara.
Ka kynhun paidbah kaba la bitar lep ha ka por janmiet, ka la khang ïa ka surok (NH-2) Imphal-Dimapur National Highway ha ki katto katne ki jaka, kynthup ïa ka ïew Kangpokpi, Motbung bad kiwei kiwei, da kaba thang ïa ki shaka kali bad ki tiar ban pynsangeh ïa ki bor pahara.
