Guwahati, Risaw:
Ka nongbah Silchar jong ka Assam, ka pynlong ïa ka elekshon Municipal Corporation kaba nyngkong jong ka ha ka sngi Saitjaiñ, 3 tarik u Risaw, hadien ba la pynkiew kyrdan ïa ka Municipal Board jong ka nongbah sha ka Corporation.
Ka Civic Body ka don 42 tylli ki ward, hynrei ki nongthep vote ki jied ïa ki nongmihkhmat ha ki 40 tylli na ki namar ba ki kyrtong ka BJP ki la ïoh ïa kiwei pat ki ar tylli ki seat khlem da don jingïakhun pyrshah.
La plie ïa ka jingthep vote ha ka por 7 baje mynstep, ha kaba ki don kumba 2.7 lak ngut ki briew kiba lah ban thep vote ha katei ka elekshon. Ki 40 tylli ki ward kiba ïakhun ki don 131 ngut ki kyrtong, katba 303 tylli ki jaka thep vote la buh na ka bynta ki nongthep vote ha kylleng ka jaka jong ka Corporation.
Ka bor pynïaid distrik ka la buh ïa ki lad jingïada bad ki jingpynbeit aiñ ha ki jaka thep vote. La shim ruh ïa ki sienjam ban pynthikna ba ka jingthep vote kan long khlem jingshah pynthut.
Na ka bynta ka Silchar, kane ka elekshon ka dei ka sien kaba nyngkong ba ki nongshong shnong ki jied dkhot jong ka Municipal Corporation ba dang shu thaw thymmai.
Ka jingjied kan seng ïa ka kynhun ba nyngkong jong ki dkhot ba la jied jong ka Corporation bad kan pynrung ïa ka rukom synshar paidbah kaba thymmai ha Silchar, ka nongbah kaba kongsan ha ka them Barak.
