Guwahati, Risaw:
Ka karkhana slasha jong ka Assam ka la lum kumba T.2.26 klur na ka bynta ban ïarap ïa ki lanot shlei um, ha kaba ka jingdie lilam kyrpang ha Guwahati Tea Auction Centre (GTAC) ka la pynmih T.1.61 klur bad u nongkhaïi u Hemant Bangur u la noh synñiang sa T.65 lak.
Kane ka jingdie lilam, kaba la pynlong da ka Tea Association of India (TAI), ka la lum lang ïa ki nongpynmih slasha, ki nongthied, ki dalal bad kiwei kiwei ki nongshim bynta ban pynmih pisa na ka bynta ka Chief Minister’s Relief Fund.
U Myntri Rangbah ka jylla, u Himanta Biswa Sarma, u la ïadon bynta lang ha kane ka jingdie lilam bad u la ïoh lum ïa ki 12 tylli ki Ceremonial Lots, kiba la ïoh lum lang baroh da T.99.51 lak.
Kane ka jingdie lilam ba kyrpang ka la khring ïa ka jingïashim bynta na ki nongthied slasha kiba heh, kiba kynthup ïa ka Society Tea, Wagh Bakri, Today Tea, Jivraj Tea bad Uphaar.
Ka Society Tea ka la paw kum ka nongthied kaba heh tam katkum ka dor thied kaba T.26.10 lak, bud sa ka Wagh Bakri kaba T.24.04 lak.
Ki nongthied nongpet na Mumbai, Surat, Ahmedabad bad Delhi ki la leit sha Guwahati ban ïashim bynta ha kane ka jinglilam ban pynmih pisa.
Ka jingpyntreikam ban lum pisa ka kynthup ïa ki jingnoh synñiang na kylleng ki jaka die lilam slasha. Ki nongpynmih ki la ai sngewbha ïa u slasha na ka bynta ka jingdie lilam, ki nongpynïaid ki la pyllait ïa ka jingdie lilam, ki ïing buh mar kiba ïashim bynta ki la pyllait ïa ka bai buh mar bad ka GTAC ka la pynsuk ïa ka jingdie kyrpang.
Ha kane ka sngi la ïadonlang da u Myntri ka Transformation & Development, Labour Welfare and Tea Tribes & Adivasi Welfare Rameswar Teli, u Chief Secretary Ravi Kota bad ki heh sorkar.
U Vice President ba rangbah jong ka TAI, u Mohit Agarwal u la ong ba ka jingkynthoh ka pyni ïa ka jingkwah jong ka karkhana slasha ban ïasnohktilang bad ban kyrshan ïa ki briew kiba shah ktah ha ka jingshlei um.
Ka seng ka la ai khublei ïa ka sorkar Assam, ka Tea Board India, ka GTAC, ki nongpynmih, ki nongthied, ki dalal, ki jaka buh mar bad kiwei kiwei ki nongshim bynta kiba la ai ka jingkyrshan ïa kane ka jingthmu.
Ka jingdie lilam ka la pynkylla ïa kawei na ki jaka khaïi pateng kaba kongsan tam jong ka Assam, ka jingdie lilam shala sha ka jinglum pisa na ka bynta ban ïarap ïa ki lanot shlei um.
