New Delhi, Risaw:
Ka Congress ha ka sngi Balang, ka la ther tyngeh ïa ka sorkar u Modi hadien ba ki pulit ka Delhi ki la ujor ejahar pyrshah ïa u Rahul Gandhi bad ka Priyanka Gandhi Vadra halor ka jingkynnoh ba ki la rung jubor ha Akashvani Bhawan, da kaba khot ïa u Myntri Rangbah duh ka ri u Narendra Modi bad ïa u Myntri ka tnat ki kam pohïing u Amit Shah kiba sniew, kiba long riewkhlaw bad ki bym peit jngai.
Ka seng pyrshah ka la ong ruh ba ka jingthoh ha ka jingkhang ka long kaba shai bha.
Kane ka jinghiar thma jong ka liang pyrshah ïa ka sorkar ka long hadien ba ki pulit ka Delhi ki la ujor ejahar pyrshah ïa kitei ki arngut ki nongïalam ka Congress bad ki nongkyrshan jong ki halor ka jingkynnoh ba ki la rung jubor ha Akashvani Bhawan ha ka por ba ki liangpyrshah ki ïaid paidbah pyrshah ïa u Chief Election Commissioner (CEC) u Gyanesh Kumar ha ka 6 tarik u Risaw.
Ïa kane ka ejahar la mudui hadien ba ki pulit ki la ïoh ïa ka jingujor kaba la kynnoh ba u Rahul Gandhi, ka Priyanka Gandhi, ki nongkyrshan jong ki bad kiwei kiwei ki MP kiba don ryngkat bad ki, ki la rung khlem jingbit hapoh ka jaka jong ka Akashvani Bhawan, la ong ki heh pulit ka nongbah Delhi.
Haba kynthoh halor kane ka jingjia, u General Secretary In-charge Communication jong ka seng Congress u Jairam Ramesh u la ong, ‘La jan ar snem mynta u Nongïalam ka Liang Pyrshah ha Lok Sabha u Rahul Gandhi u la pynpaw pyrthei khlem sangeh, lyngba ki sakhi ba shisha, ïa ka jingïasuhbuit sniew halor ka vote kaba la long hapdeng u Myntri Rangbahduh bad u Myntri ka tnat ki kam pohïing ha kawei ka liang bad u CED ha kawei pat ka liang,” la ong u Ramesh ha ka rynsan X.
Ka Lok Sabha LoP u Rahul Gandhi bad ki MP jong ka seng Congress ka Priyanka Gandhi Vadra bad ka Selja Kumari ha ka jingïaid paidbah ba la ïalam da ka INDIA block ha ka jingïaid paidbah na Parliament House sha Nirvachan Sadan, da kaba dawa ïa u Kumar ban weng noh ïa ka kam halor ka jingkynnoh ba don ka jingleh bymsuidñiew ha ka jingpynrung kyrteng ha ka elekshon ha New Delhi ha ka sngi Ba-ar.
Ha kane ka sngi la don lang u MP ka RJD u Manoj Kumar Jha bad u MP ka TMC u Abhishek Banerjee.
Da ki klur ngut ki nongthep vote ba shisha ki la duh noh ïa ka hok jong ki katkum ka Riti synshar ka ri ban thep vote lyngba ka jingpyntreikam da ka SIR,” la ong u Ramesh.
Bad haba u Nongïalam ka Liang Pyrshah ha Lok Sabha u shim ïa ka rukom jong ka Satyagraha ban pynpaw ïa ki jingbymhok jong ka SIR, ki pulit ka Delhi ki mudui da ka ejahar pyrshah ïa u bad ïa kiwei pat ki nongïalam, u la ong.
“Ki arngut ki riewsniew ki la sngewkhynñiuh, ki leh riewkhlaw bad ki la duh jingkyrmen. Ka jingthoh ha ka kynroh ka long kaba shai bha,” la ong u Ramesh. Hadien, u Ramesh u la ïathuh ha ka lad phah khubor ba katba u Rahul Gandhi u dang ïakhun pyrshah ïa ka SIR, ki “arngut ki riewsniew” ki dang bunkam ban ujor ejahar.
Ha ka sngi Ba-ar, kine ki arngut ki nongïalam ka Congress, ki dei napdeng ki 260 ngut ki briew kiba la shah kem hadien ka jingïakhih kaba la neh palat 8 kynta hapoh jong ka Akashvani Bhawan hadien ba ka jingïaid paidbah jong ka INDIA bloc sha ophis jong ka Election Commission ka la shah pynsangeh ha ki pulit.
Ki MP ka liangpyrshah, ki la ïakhih pyrshah ïa ka jingkynnoh ba ka don ka jingbym ïaid beit ha ka jingtreikam jong ka Election Commission hapoh ka jingpynïaid jong u Chief Election Commissioner (CEC) u Gyanesh Kumar bad ka jingpyntreikam ïa ka SIR ïa ki thup kyrteng thep vote, kaba la pynmih ïa ka mat jong ka jingleh thok ha ka Vote.
