Itanagar, Risaw:
U MP ka Rajya Sabha na Arunachal Pradesh u Tai Tagak u la leit jngoh ïa ka shnong Wakka kaba don ha Longding distrik kawei na ki shnong ba nyngkong eh ha khappud Indo-Myanmar kum shibynta jong ka Seva Sankalp Abhiyan. Ha kane ka jingleit jong u, u Tagak u la leit sha ka prokram Aangan Milan Seva bad u la ïakren bad ki khynnah, ki nongtrei ASHA, ki nongtrei Anganwadi bad ki nongïarap Anganwadi.
Ka prokram ka la pynleit jingmut ha ka jingïatreilang bad ki paidbah bad ka jingsngewthuh ïa ki jingeh ba ki nongtrei ba hakhmat eh bad ki khynnah kiba sah ha ki jaka ba jngai bad ki jaka khappud ki ïakynduh. U Tagak u la ïohsngew ïa ki jingeh ba la pynpaw da ki nongtrei ASHA bad Anganwadi bad u la pynthikna ïa ki ba ïa ki jingeh ba shisha jong ki yn rah sha ki bor ba dei peit ban leh ïa kaba donkam.
Haba ïakren bad ki khynnah, u MP u la pynshlur ïa ki ban pynleit jingmut ha ka pule puthi, ban pynneh ïa ka koit ka khiah bad ban bud ïa ki jingangnud jong ki da ka jingsngewskhem.
U la ong ba ki khynnah kiba sah ha ki jaka ba jngai bad khappud ki dei ban ïoh ïa ka lad kaba mar katjuh bad ban ïoh ïa ki jingshakri kiba donkam.
U Tagak u la ai khublei ruh ïa ka jingnoh synñiang jong ki nongtrei ASHA, ki nongtrei Anganwadi bad ki nongïarap, kiba dang ïai bteng ban ai ïa ki jingshakri kiba donkam wat hapdeng ki jaka kiba ïakynduh jingeh bad ka jingïadei kaba duna ha ki jaka khappud.
