Kyiv, Risaw:
Ka India ha kane ka kynti, la ong ba ka la tyrwa ïa ka mat jingiakren kaba don lai bynta, na ka bynta ka jingiamynjur lang hapdeng ka Russia bad ka Ukraine, kaba ialeh thma, da kaba wad ïa ka bynta kaba kham khraw ban pyniasuk ïa katei ka jingiakynad, kaba la neh mynta la 5 snem kynthih. Ka jingtyrwa ban sangeh thma ka kynthup ïa ki jingtei bor ding bad ka jingshalan lieng khaii lyngba ka duriaw bah, la iathuh ki nongsakhi kiba tip bha shaphang kane ha ki nongthoh khubor jong ka NDTV.
Kumta la ong ba ka India ka la pynsngew ïa ka jingthmu ban iapynsangeh sha ka Ukraine, ha ka por ba u Myntri kam bar ri ka India- u S Jaishankar u la leit sha ka nongbah Kyiv ha u bnai ba la dep, la iathuh ki briew kiba tip bha ïa katei ka jingjia sha ka NDTV.
U Myntri kam bar ri jong ka Ukraine, u Andrii Sybiha, u la pynthikna ba ka Kyiv, ka la ioh ïa kum katei ka jingtyrwa, na New Delhi, ha kaba u khot ïa katei ka jingtyrwa, kaba kham bniah, napdeng ki saw tylli ki jingthmu jong ka pyrthei, kiba thmu ban pynkut noh ïa ka thma bad ka Russia. Ka Ukraine ka la ioh ruh ïa ki jingtyrwa ban sangeh ialeh kiba lah ban long na ka Turkey, Egypt bad ka America.
Ka Sybiha ka la ong ba ka Kyiv ka long kaba la pynkhreh ban pyrkhat ïa ki rukom bapher bapher na ka bynta ka jingïateh kular, hynrei kano kano ka jingïateh kular ka dei ban kynthup ym tang ïa ki kam ïaleh pyrshah hynrei wat ïa ki jinghiar thma ïa ka bor ding bad ki jingtei jong ka kad liengsuiñ bad ka jinglong jingman ha ka Duriaw Basaw.
Kane ka jingkren jong u ka long hadien ba u President ka Russia u Vladimir Putin u la ong ba u Myntri Rangbahduh jong ka Ri, u Narendra Modi “u don ki jingmut kiba bha kiba thmu ban wad ïa ki lad ki lynti kiba lah ban ïa pdiang lang, ki lad ki lynti” ban pynkut noh ïa ka thma bad ka Ukraine. U la ai khublei ruh ïa u PM Modi uba la bat ïa ka nongrim ba pdeng katba u dang shimkhia ban pynkut noh ïa ka jingïakynad.
