Dhaka, Naiwieng:
U Myntri Rangbahduh ka ri, u Tarique Rahman, ha ka Sngi Palei, u la kynnoh ba ka Sheikh Hasina, ka nongialam jong ka seng Awami League, kaba la shah weng noh na ka shuki, ka la thmu ban pynthut ïa ka ri Bangladesh, ha kaba, u la kyntu ruh ïa ki paidbah ba kin iatylli lang ban ai ïa ka jubab kaba biang, ïa kiba thmu ban pynim biang ïa ki kam thombor kum jong ki lehnoh, ki kam pyniap briew bad ki kam thok vote ha ka ri.
Haba kren ha ka jingïalang paidbah ha ka thaiñ Shatei Lam Mihngi jong ka Lalmonirhat, kaba don ha khappud bad ka India, u Rahman u la kynnoh ïa ki nongkyrshan jong ka Awami League ba ki pyndonkam da ki jingthang ding bad ki jingpynïap briew ban wanrah ïa ka jingkulmar namar ba ka jingkhang khyrdep kaba shisngi ha baroh kawei ka ri kaba la khot da ka seng jong ka Hasina ka la pynmih ïa ki jingïakynad ha ki katto katne ki jaka.
“Ki paidbah jong ka ri kim kwah ban wanphai biang sha ka sain pyrthei jong ka jingpynjah burom, ka jingpyniap briew, ka jingthang ding, ki kam lehnoh bad ka jingshim kabu ïa ka hok thep vote jong ki paidbah. To ngin iatylli bad ai ïa ki lehnoh ïa ka jubab kaba biang, khnang ba kin ym lah shuh ban ialehkai bad ka jinglong jong ka Bangladesh bad ki briew jong ka,” la ong u BSS.
Kane ka jingkren jong u ka long ha ka por ba ka Bangladesh ka la pynjari haduh 3000 ngut ki shipai paramilitary ha kylleng ki hynriew tylli ki district hadien ki jingjia thang ding, ka jingbthei bom khniang bad ka jingpynjot, kaba la pynthut ïa ka leit ka wan ha ki katto katne ki bynta jong ka ri.
U Myntri Rangbahduh ka ri Rahman, u la ong ba ka sorkar Awami League, kam dei tang ba ka la iehnoh ïa ka jingmyntoi jong ka ri bad ki paidbah jong ka, hynrei ka shakri ruh ïa ka jingmyntoi jong ki “kynrad” jong ki, kiba don shabar u pud u sam, ha kaba ki la phet rieh hadien ba ki la shah pynhap noh na ka bor synshar. Hynrei um shym la jer kyrteng ïa kano kano ka ri.