Mumbai, Risaw:
U Myntri Rangbah ka jylla Maharashtra, u Devendra Fadnavis, ha ka sngi Balang, u la ïakynduh ïa u Myntri ka tnat ki kam pohïing jong ka sorkar pdeng, u Amit Shah, ha New Delhi bad u la ïathuh ha u, halor ka jinglong jingman jong ka jingrang tyrkhong, da kaba pan jingïarap pisa na ka sorkar pdeng.
U Fadnavis u la ïathuh ba la pynbna ïa ka jingrang tyrkhong ha ki 265 tylli ki thaiñ bad ki lad jingïarap ki dang treikam.
“Nga la aiti ïa ka jingkyrpad na ka liang ka sorkar jylla ha kaba ïadei bad kane ka bynta,” u la ong haba pan jingïarap lyngba ka National Disaster Response Fund (NDRF). U Shah u la pynthikna ïa u ba ka Maharashtra kan ïoh ïa ka jingïarap kaba heh tam.
U Fadnavis u la ïathuh ba u Shah u la bthah ïa ka kynhun jong ka sorkar pdeng ban leit sha Maharashtra hapdeng ka 8 bad ka 11 tarik u Risaw ban bishar bniah ïa ka jinglong jingman ha kane ka bynta.
“Ka sorkar pdeng ka ïeng skhem bad ka Maharashtra ha ka por jong ka jingeh,” u la ong da kaba pynpaw ka jingsngewnguh halor ka jingpynthikna.
Kham hashwa, u Deputy Chief Minister u Eknath Shinde u la ïakren halor kane ka jingrang tyrkhong bad u Myntri Rangbahduh ka ri u Narendra Modi bad u la ong ba ka sorkar pdeng ka la pynthikna ïa ki jingïarap baroh kiba lah ban ïoh.
U Shinde u la ong ba ka sorkar jylla ka la bthah ïa ki bank ban sangeh noh ïa ka jingshim ram na ki mar rep mynta u snem bad ban pynbeit thymmai ïa ki khnang ba ki nongrep kin ïoh shim ïa ka ram na ka bynta ka aïom Kharif ha u snem ban wan.
“Watla ka don ka jingeh jong ka jingkyrduh um, ki nongrep jong ka jylla kin ym shah ban leh ïa ka Diwali ha ka por ba dum,” ong u Shinde bad bynrap ba u Modi u la pynlut por shi kynta ban ïakren halor ka jingeh watla u bunkam bha. U Shinde u la ong ba ki nongrep kin ym shah iehnoh ha ka jingeh.
“Ki nongrep ki dei ki mat jong ngi. Ha ka jaka ban leh politik, baroh ki dei ban trei ban kyntiew ïa ki nongrep”, u la ong bad bynrap ba ka Shiv Sena kan leh “100 percent ka jingtrei paidbah” ha kaba ïadei bad kane ka jingïakynduh jingeh.
