Washington, Risaw:
U President jong ka America, U Donald Trump ha ka Sngi Balang u la iathuh ba ka thma bad ka Iran, kan kut noh shen bad u la kynnoh ba ka dor jong ka umphniang, kan sa “wan hiar dor”, katba u dang pynskhem ba ka US, ka la shim noh ïa ka bor nuclear jong ka Iran.
“Ka dei ka thma na ka jingïohi jong kaei kaba ngi dei ban leh. Ngi hap ban pynduh noh ïa ki tiar nuclear na ka bynta ka Iran. Ngi la shim noh ïa ka bor nuclear jong ki. Lada ki don ïa ka bor nuclear, phin jin da la ïoh ïa ki jingeh kiba phim pat ju ïoh mynno mynno ruh,” ong u Trump haba ïakren bad ki nongthoh khubor haba mih noh na Washington sha ka jingïalang ïalap elekshon jong ki Republican ha San Antonio.
“Ka ri jong ki baroh kawei mynta ka la shah pynduh jait. Kan sa kut noh kloi bha, bad ynda ka la kut noh, ka dor jong ka umphniang kan sa wan hiar dor,” u la bynrap.
Ha kajuh ka por, u nongaiktien jong ka sorkar Iran, U Fatemeh Mohajerani, u la kyntait ïa ki jingkynthoh jong U Trump, ba u myntri umphniang jong ka Iran, u la iehnoh kam, namar ka jingshah pynbor jong ka thma US, ha kaba u la batai ïa katei ka jingkynthoh, ba ka dei “ka jingpyrshang lehnohei, ban buhrieh ïa la ki jong ki jingtlot”, ong ka khubor Al Jazeera.
U nongaiktien u Mohajerani u la ong ba ka jinghiar shuki jong u myntri umphniang kam dei “ka dak jong ka jingtlot”, hynrei ka dei ka nuksa jong ka jinglong jem hapoh ka rukom synshar khadar kaba skhem.
Haba kren sha ki nongthoh khubor, u Trump u la ong ba u myntri umphniang jong ka Iran “u shu sangeh noh”, da kaba kynnoh ba utei u heh sorkar u la ong ïa u, “Ngim don ka ioh ka kot, ngim don umphniang, ngim don ei ei.”
Ha kajuh ka por, u myntri kam bar ri jong ka Iran, u Abbas Araghchi, u la ong ba katba ka Iran ka dang kut jingmut ban iada ialade, ki heh sorkar ki shim khia bha ban pyndonkam ïa ka kam iakren ban pynskhem ïa ka jingmyntoi jong ka ri bad ka jingshngain jong ka ri, kumba la iathuh da ka Al Jazeera.
Ha ka jingiakynduh bad ki heh sorkar jong ka Iran, u Araghchi u la ong ba ka kynhun jong ka Iran sha ka dorbar bah jong ka United Nations ha New York ka la pyndonkam ïa kane ka jingleit ban pyni ïa ka jingthmu iasuk kaba hynriew sngi sha ka US ban plie biang ïa ka Strait of Hormuz, la iathuh ka Al Jazeera, da kaba pynshong nongrim ha ka Telegram channel jong u.
U Trump u la kyntait ïa ka jingtyrwa jong ka Iran shisngi hadien ba la wanrah ïa ka ha kaba kut jong u bnai ba la dep, bad ki heh jong ka US ki la pynmih ïa ka jingtyrwa pyrshah kaba wad ban pynim biang ïa ki jingïakren ban pynkut noh ïa ka thma.
Ha kajuh ka por, u Vice President jong ka US, u JD Vance kham mynshwa u la kren shai ba ka Tehran ka dei ban pynlong ïa ka jingpynhiar kaba “don jingmut” ha ka jinglah ban pynriewspah ïa ki tiar nuclear ha shwa ba ka Washington kan mynjur ban pynsangeh noh ïa ka thma kaba hynriew bnai bad ka Iran.
Ha ka jingïakren ba kyrpang bad ka Reuters, u Vance u la ong ba ka America ka dang plie ïa ka jingïapynbeit hynrei kan pyrshang ban shim ïa ki sienjam kiba skhem na ka Iran ban ïa ki jingpynthikna shaphang ki pud jong ki nuclear ha ka lawei.
