Guwahati, Rymphang:
Ki bor sorkar ka Central Bureau of Investigation (CBI) ha ka 6 tarik mynta u bnai ki la ïathuh ba ki la ïoh ban kem ïa 2 ngut ki nongtrei ka Northeast Frontier Railway (NFR) bad ïa uwei u karikor na ka nongbah Guwahati bad Silchar na ka daw jong ka jingdonkti jong ki ha kawei ka kam bam sap.
Kat kum ka khubor ba la ïoh lum la ïathuh ba ki bor sorkar ka CBI ki la ïoh ban kem ïa u Deputy Chief Engineer Rampal Dey bad ïa u Senior Section Engineer (SSE) Santosh Kumar jong ka tnat NFR bad ïa uwei u karikor jong kawei ka kompani shimet na ka nongbah Guwahati u ba la tip kyrteng kum u Sajjan Choudhury.
Kat kum ki jingïoh lum jingtip la ïathuh ba na ka liang ka CBI ka la dep ban pynrung da ka mokotduma pyrshah ïa 4 ngut ki heh sorkar ka NFR bad ïa kiwei kiwei kiba kynthup ruh ïa u karikor bad ki nongtrei jong katei ka kompani shimet kaba na ka nongbah Guwahati.
Kat kum ka kyrwoh ba la pyllait da ka CBI, la ïathuh ba kitei ki heh sorkar ka NFR ki la don bynta ha ki kam beaiñ ban ai jubor ïa ki jingtrei sha katei ka kompani riew shimet da kaba pynkhreh ïa kia ‘Measurement Book’, ‘Account Bills’, ka jingpyllait kyrkieh ïa ki ‘bills’ na ka bynta ka jingpyntrei ïa ki kam ki jam jong NF Railway bad kumjuh ruh ka jingpyllait kloi ïa ki Security Deposit bad Bank Guarantees.
La ïathuh ba na ka liang ka CBI ka la ïoh ban kem ïa kitei ki 2 ngut ki nongtrei ka NFR na ka thaiñ Silchar katba ki dang leit ban pdiang ïa ka pisa kaba haduh T.8 lak na uwei u nongtrei jong katei ka kompani shimet.
Ki bor sorkar ka CBI ki la ïathuh ruh ba ïa ki jingleit khynra la leit ban pynlong ha ki 19 tylli ki jaka kynthup ruh ha Assam, Imphal, Delhi, Bihar bad Haryana bad ha ki jaka sah jong kitei kiba la shah kem; bad na kitei ki jaka ki bor sorkar ka CBI ki la ïoh ruh ban kurup ïa haduh T.1.02 klur. Ïa baroh kitei kiba la shah kem la leit ban rah tian bishar sha ka ïing kashari jong ka CBI.
