Patna, Rymphang:
Kumba la bna, la ong ba u President jong ka seng JD(U) ha ka ri bad u MP u Rajiv Ranjan Singh ba la tip ruh da ka kyrteng kum u Lalan Singh u la ong ba u Upendra Kushwaha un ym bat shuh ïa ka kam kum u Parliamentary Board Chairman jong ka seng.
“U Kushwaha um shym bat ïa kano kano ka Post ha ka seng,” la ong u Singh, ha kaba u la buh ïa shibun ki jingai jingmut ha kaba u la ong ruh ba ym lah shuh ban don ka jingïakren bad ka jingïasngewthuh jingmut hapdeng u Kushwaha bad ka kynhun nongïalam jong ka seng.
Wat lada kam pat don ka jingpynbna paidbah shaphang ka jingiehnoh ne pyllait jong u Kushwaha ïa kam ba u bat hapoh ka seng, ki jingkren jong u Singh ki la pynpaw ba ka kynhun nongïalam jong ka seng ka la pynkhreh na ka bynta ban pynkut noh ka jingïadei bad u Kushwaha shen.
U Singh u la kynnoh ruh ba u Kushwaha u la pynshoi pynshit ïa ki nongbud jong ka seng ba kin long pyrshah ïa ka kynhun nongïalam jong ka seng.
U la ong ba ka seng ka la burom bha ïa u hynrei ma u pat u la long pyrshah ïa ka. Hashwa kane u Nitish u la ong, “Nga la kyntiew ïa u Kushwaha da kaba pynlong MLA ïa u hynrei u la iehnoh ïa ka seng. Haba u la wanphai biang sha ka seng, nga la pynlong ïa u u dkhot jong ka Rajya Sabha hynrei hangne ruh u la iehnoh ïa ka seng. Mynta u la dei ban wanphai sha ka seng ha ka sien kaba lai hynrei ngam shym tip eiei kaei kaba la jia ha kine ki ar bnai ba la leit. Nga la shah bthah ba nga la dei ban kren bad pynsngewthuh ïa u hynrei um shym la leh kumba la dei ban leh ha kaba u la tip ba kan pynbha ïa u.”
U Myntri Rangbah jong ka Bihar u Nitish Kumar u la ong ba u Chairman jong ka JD(U) Parliamentary Board u Kushwaha uba pyrshah seng u la long uba laitluid na ka bynta ban ieh ïa ka seng bad ban leit pynïasoh sha kiwei pat ki seng ba u kwah ban leit. Ha ka jingïakren bad ki nongthoh khubor ha ka por ba la don ka ‘Samadhan Yatra’, u Nitish u la ong ba lada don mano mano kiba la wan hapoh ka seng bad rai ba kin mih noh, kata u la long uba laitluid ban ieh ïa ka seng da ka mon jong u.
Kine ki jingkren jong u Nitish ki la long arsngi hashwa ban pynlong ïa ka jingïalang jong ki nongbud ka seng da u Kushwaha ha Patna ha ka 19 tarik bad 20 tarik, Rymphang.
Ha ka sngi U Blei, u Kushwaha u la phah da ka shithi sha ki nongbud ka seng ha kaba u la wer ïa ki sha ka jingïalang na ka bynta ban ïakren halor ki jinglong jingman hapoh ka seng JD(U).
U la pynshisha da kaba ong ba ha ka shithi kaba u la phah ba ka seng ka la nang tlot namar ki rukom pyntreikam kiba hapoh ka seng.
