Kolkata, Rymphang:
Ka ïingbishar bakyrpang ka PMLA kaba don ha Kolkata ha ka sngi Ba-ar ka la kyntait ïa ka jingkyrpad jamin jong u Myntri barim jong ka West Bengal u Partha Chatterjee ha kaba ïadei bad ka jingdonkti halor ka kam bamsap kaba la mih na ka jingthungkam ha ka skul, ha kaba ka la ong ba u la long u briew uba la hakhmat eh bad uba donbor bad uba lah ban pynthut ïa ka rukom tohkit halor kane ka jingjia.’
U Chatterjee, uba la shah set patok naduh ka 23 tarik, Naitung jong u snem ba la lah, u la buh da ka jingkyrpad jamin bad ong ba u la shah set slem bad ba ka jingpynlong ïa ka jingleit khynra bad ka jingkurup ka la dep.
Kum ka jingpynshisha ba ki sabut ba la lap kiba don ha ki jingthoh bad ki Electronic Device ba la kurup da ka kynhun Enforcement Directorate (ED), u nongïasaiñ aiñ na ka bynta jong u u la ong ha ka ïingbishar ba kam long kaba suk ban pynduh noh ïa ki lada u shah pyllait jamin.
Kum shi bynta ban pyrshah jur halor kane ka jingkyrpad, ka kynhun ED haba ïakren halor u nongthaw aiñ barim jong ka spah snem kaba 19 u Ishwar Chandra Vidyasagar, ka la ong ba wat lada ïa u Vidyasagar bad u Partha Chatterjee la kha ha Bengal, une uba hashwa u la paw ba u la kyntiew ha kaba ïadei bad ka pule-puthi ha ka jylla katba une u Myntri u la paw ba u la don jingthmu ban pynsniew ïa ka.
Ka kynhun tohkit ka la ong, “U Vidyasagar u la ïaid shakhmat na ka bynta ban pynbha ïa ka rukom pyntreikam ha ka pule puthi jong ka Bengal da 100 snem hynrei u Partha Chatterjee u la thmu ban wanrah ïa ka jingsahdien halor kane da 100 snem.”
U heh ka kynhun tohkit u la ong ba u Chatterjee u la shah kynnoh ba u la donkti ha ka jingkamai ïa ka spah kaba beaiñ da kaba ïaid da ka lynti kaba beaiñ bad ka jingïasuhbuit sniew na ka bynta ban thung kam beaiñ ha kiba bun ki jaka treikam jong ka tnat pule-puthi.
