Lucknow, Rymphang: Ka Allahabad High Court ka la rai pyllait jamin ïa ki phra ngut ki briew haduh ka 20 tarik, Lber halor ka jingshah kynnoh donkti ha ka jingjia ïakynad kaba la jia ha u snem 2021 ha Lakhimpur.
Haba la kheiñlang, la ong ba ki la don baroh kumba 13 ngut kiba la shah kynnoh donkti ha ka jingjia kynthup ïa u Ashish Mishra, uba dei u khun jong u Myntri ka sorkar kmie uba dei khmih ïa ka tnat ki kam pohïing u Ajay Mishra ba la tip ruh da ka kyrteng kum u Teni, ïa kiba la shah pyllait jamin.
Ka kynhun nongbishar ha Lucknow ka la pdiang ïa ka hukum ha ka sngi Ba-ar kum ka jingpyntreikam ïa ka hukum jong ka Supreme Court ha ka 25 tarik, Kyllalyngkot, kaba la ai jingbit ban pyllait jamin ïa u Ashish Mishra.
Ka kynhun nongbishar jong u Justice Rajesh Kumar Singh Chauhan ka la buh ïa ka 20 tarik, Lber kum ka tarik ban bishar bniah halor ka jingjia.
Kiba la shah pyllait jamin ki dei kiba la tip kyrteng kum u Ankit Das, Nandan Singh Bisht, Latif ba la tip ruh da ka kyrteng kum u Kale, Satyam Tripathi ba la tip ruh da ka kyrteng kum u Satya Prakash Tripathi, Shekhar Bharti, Ashish Pandey, Rinku Rana bad u Sumit Jaiswal.
Ka kynhun nongbishar ka la buh kijuh ki kyndon kumba la pynbna ha ka hukum ba la pyllait jamin ïa u Ashish Mishra.
Ha kaba ïadei bad ka jingpyllait jamin ïa u Ashish Mishra da kumba 8 taïew, ka ïingbishar ba hakhliehduh ka la hukum ïa u ba u la dei ban mih noh na Uttar Pradesh tang hapoh shi taïew hadien ba u la shah pyllait na patok.
Ka ïingbishar bahakhliehduh ka la ong ba u Ashish u la dei ban shong ha Uttar Pradesh ne Delhi ha kine ki por ba u la shah pyllait jamin.
Lada don kano kano ka jingthmu jong u Ashish Mishra, ki bahaïing ne ki nongkyrshan jong u kiba ïaleh ban pynthut ne byrngem ïa ki nongsakhi ha ka jingjia, yn sa weng noh shi syndon ïa ka hukum pyllait jamin.
Ha ka 3 tarik, Risaw, 2021, ki la don kumba 8 ngut ki briew kiba la shah pynïap ha Tikunia kaba don ha Lakhimpur Kheri ka jaka ha kaba la jia ka jingïakynad jong ki nongrep kiba la pyrshah ïa ka jingleit jngoh jong u Symbud Myntri Rangbah u Keshav Prasad Maurya sha katei ka thaiñ.
Katkum ka jingujor ejahar jong ki pulit ka Uttar Pradesh, la ong ba ki la don kumba 4 ngut ki nongrep kiba la shah ïuh da ka SUV ha kaba u Ashish Mishtra u la shong.
Hadien kane ka jingjia, u nongñiah jong ka SUV bad arngut ki nongbud jong ka BJP ki la shah pynïap ha ka kynhun jong ki nongrep.
Uwei u nongthoh khubor ruh u la ïap ha kane ka sngi ba la mih ka jingïakyn-ad.
