Raipur, Rymphang: U Director General of Police (DGP) jong ka Chhattisgarh u la phah da ka shithi sha u Director General jong ka National Investigation Agency (NIA) ban dawa phah tohkit halor ka jingshah pynïap jong ki lai ngut ki nongmihkhmat paidbah ha ka thaiñ Bastar, la ïathuh ki heh pulit ha ka sngi Palei.
“U DGP jong ka Chhattisgarh u la phah da ka shithi sha ka kynhun NIA na ka bynta ban dawa phah tohkit halor ki jingjia jong ki jingshah pynïap ki lai ngut ki nongïalam jong ka seng BJP tang ha ki 10 sngi,” la ong ka jingthoh ba la phah sha ki nongthoh khubor.
Kane ka jingdawa ka la long hadien ka jingshah pynïap jong ki lai ngut ki nongïalam jong ka seng BJP ha ki lehnoh Maoist ha ki 10 sngi ha ka thaiñ Bastar.
Ka jingthoh kaba la wan na ka sorkar jylla ka la bynrap shuh shuh da kaba ong ba u Myntri Rangban jong ka jylla u Bhupesh Baghel u la ai ka jingïaroh sha ka kynhun ki shipai ïada ri.
“U Myntri Rangbah u la ong ba ka la don ka jingpyntreikam kaba jop, ka jingshaniah bad ka jingshngaiñ da ka jingtrei shitom ki shipai ïada ri ha kaba kane ka la pynduna ïa ki kam pyntriem jong ki lehnoh ha ka jylla,” la bynrap shuh shuh ka jingthoh.
“Ki la don baroh kumba 555 ngut ki lehnoh Maoist kiba la leit ban pyndem ha ki kti jong ka aiñ ha Chhattisgarh ha u snem ba la lah naba ka jingpyntreikam jong ka sorkar ban ai jingïarap bad myntoi ïa ki ka la treikam bad kumjuh na ka jingai mynsiem jong ki pulit ka Chhattisgarh, ha kaba kane baroh ka la pyni ïa ka dak jong ka jingjop. Ha kum kane ka por, kiba don kumba 46 ngut ki lehnoh Maoist kiba la shah pynïap ha ka por ba don ka jingïasiat kaba markylliang bad ki kynhun shipai ïada ri,” la pynshisha ka jingthoh ba la phah.
Kumba ka la jia, la ong ba ha ka sngi Saitjaiñ jong ka ïatew ba la lah, u nongïalam shnong barim bad u dkhot jong ka seng BJP u Ramdhar Alami, u la shah pynïap ha ki lehnoh Maoist ha kaba ki la kynnoh ïa u ba u la dei u nongai khubor shaphang jong ki sha ki pulit.
Ki la kynnoh ruh ïa u ba u la long u nongrong tuh ïa ka pisa ha kaba ïadei bad ka jingpyntreikam ïa ka Bodh Ghat Project.
Ha ka 10 tarik, Rymphang, u Vice-President jong ka seng BJP ha Narayanpur distrik u Sagar Sahu u la shah siat ïap ha Chhote Dongar jong ka Narayanpur bad ha ka 5 tarik, Rymphang, u Mandal President u Neelkanth Kakkam u la shah pynshisha ba u la shah pynïap ha ki lehnoh jong ka thaiñ Awapalli jong ka Bijapur distrik.
