Chandigarh, Rymphang: Ka kynhun Myntri ha Himachal Pradesh ha ka jingïalang kaba ar ba la dep ban pynlong hynnin ka sngi, ka la rai ba ki khunswet ïa kiba la shah ñiew ba ki dei ki khun jong ka jylla, kin sa shah shimti noh ha ka sorkar jylla ha kaba kan sa pynthymmai ïa ki skhim ai jaka sah bym treikam shuh, ki jaka sah khun swet bad ki ïing sah na ka bynta ki tymmen ki kro bym don shuh ki nongri hapoh ka jingtreikam jong ka skhim ‘Mukhya Mantri Sukh-Ashray Yojana.’
Ka skhim kaba T. 101 klur kan sa ai jingïarap ïa ki khun swet bad kito ki khynnah kiba sah bad ki bahaïing jong ki, khamtam ki khynnah kiba don jingduna dkhot met, ki longkmie kiba duk bad ki tymmen.
Ka sorkar ka la ong ba ka jingpyntreikam jong kane ka skhim kan kynthup ha ka ban shna ïa ki kamra pyndonkam kumba dei ban don, ki Smart Class, ki Coaching Room,ki jaka ïalehkai na ka bynta ki Indoor bad Outdoor Sport, ka Music Room, bad kiwei pat ki kamra kiba dei ban buh katkum ba la thmu.
Kum shi bynta ban pynbiang ïa ki jingdonkam na ka bynta ka pule puthi jong ki khunswet, la donkam ban pynbiang ïa ki rukom ai jinghikai kiba kyrpang.
