New Delhi, Rymphang:
Ki kynhun jong ki riewngeit Khristan ki la pynlong da ka jingïakhih ha Jantar Mantar kaba don ha New Delhi ban pyrshah jur halor ka jingshah thombor jong kiba bun ki ïingmane, ki jingshah leh donbor shah thombor bad shahkem jong ki riewngeit Khristan ha kylleng ki bynta jong ka ri.
“Ngi la shah kynnoh ba ngi la pynbor ha ka ban pynrung ha ka jingngeit Khristan ïa ki briew. Ki briew kiba na ka kynhun jong ki riewngeit Khristan ki la pynpaw ka jingpyrshah jur halor ka jingshah ibeiñ bad shah thombor jong ki Khristan, ha Jantar Mantar. Ki ïingmane ki la shah pynjulor, ki briew jong ngi ki la shah shoh bad shahkem. Ki riewngeit Khristan mynta ki don hapdeng ka jingsyier,” la ong u Steven u riewngeit Khristan uba long u nongshong shnong jong ka Uttar Pradesh.
U la pynshisha da kaba ong ba ka ri ka la sakhi ba ka la don kumba 525 tylli ki jingjia kiba la paw ba ki la long pyrshah ïa ka kynhun jong ki riewngeit Khristan ha u snem 2021 bad 600 tylli ha u snem 2022.
“Ha Uttar Pradesh, ki jingjia kiba kum kine ki la nang bun bad kiew na ka 70 tylli ha u snem 2020 sha ki 183 tylli ha u snem 2022,” u la pynshisha.
Uwei pat u riewngeit Khristan ïa uba la tip kyrteng kum u Shivpal uba na Fatehpur kaba don ha Uttar Pradesh u la pynshisha da kaba ong ba ki pulit jong ka jylla ki la kem ïa ki briew halor ka jingkynnoh ba ki la pynkylla niam Khristan ïa kiwei pat.
“Ngim shym la ïoh jingbit ban duwai ha ki ïing jong ngi. Ki la don kumba katto katne ngut ki longkmie kiba la shahkem naba ki la pynlong jingduwai ha ka por ba don kawei ka jingrakhe sngikha,” u la ong.
Kawei na ki jingujor ejahar ba la buh pyrshah ïa ki Khristan ka la buh kyrteng ruh pyrshah ïa uwei u khynnah uba la 11 snem ka rta bad uwei u briew uba la ïap noh ha u snem 2010, la pynshisha u Steven.
“Kiba bun ki ïingmane ki la shah thombor bad ki riewngeit Khristan ki la shah thombor, kine ki jingjia ki la jia ha Chhattisgarh, Rajasthan, Uttar Pradesh bad ha kiba bun kiwei pat ki jylla. Ïa ki jingmudui la buh pyrshah ïa ki khlem nongrim bad da ki jingkynnoh bymhok. Ngi la wan hangne ban pynpaw ka jingsngewlem jong ngi ïa ki hynmen ki para jong ngi kiba la ïakynduh jingeh na kine ki jingshah thombor,” la ong ka Poonam kawei na ki riewngeit Khristan kaba na Punjabi Bagh kaba ha Delhi.
