New Delhi, ïaïong:
U Myntri ka Sorkar Pdeng uba dei peit ïa ka Social Justice and Empowerment bad u President ka Republican Party of India (Athawale) u Ramdas Athawale u la pynpaw ïa ka jingshaniah halor ka jingjop jong ka kynhun National Democratic Alliance ha kane ka elekshon sha ka Ïingdorbar Thawaiñ ha baroh san tylli ki jylla.
“Ngi la rai ba ngi ïakhun elekshon ha ki 4 tylli ki jaka ha Assam bad ngi dang pyrkhat ban ïakhun ha ki 3 tylli ki jaka ha Tamil Nadu, ki jingpynrung kyrteng ki dang sdang hangtei, bad ha Keralam ngi ïakhun ha kawei ka seat, ha ki jaka ba dang sah ngin kyrshan ïa ka sorkar NDA-BJP, bad ngi ngeit skhem ba ka sorkar NDA kan wan hapoh ka jingïalam jong ka seng BJP bad kan synshar ha ki san tylli ki jylla,” u la ong ha ka jingïakren bad ki nongthoh khubor.
Ha ka step jong ka sngi Thohdieng, u Athawale u la pdiang sngewbha ïa ka rai jong ka sorkar ban pynduna ïa ka khajna na ka petrol bad diesel, da kaba ong ba katei ka rai kan wanrah ïa ka “jingsuk” ïa ki paidbah.
“Ka jingpynhiar ïa ka Excise Duty kan ai jingsuk ïa ki paidbah. Kane ka rai ka long kaba pdiang sngewbha. Ka sorkar jong u Myntri Rangbahduh ka ri Narendra Modi ka trei na ka bynta ka roi ka par jong baroh bad ka sngewkhia ïa baroh ki bynta jong ka imlang sahlang,” la ong u Athawale ha ki nongthoh khubor.
