Shillong, Jylliew 09:
Ka Khliehmawlieh Youth Club ka la pynpaw ïa ka jingbynñiaw kaba jur halor ka jingleh ka Meghalaya Football Association (MFA) ha kaba ïadei bad ka jingpynïalehkai ïa ka semi final jong ka Meghalaya State League.
Ha kane ka jingïakhun semi final (1st leg) ka Khliehmawlieh (kaba lamkhmat na ka Group-D) kan pynkhreh ïa ka jingïakhun ha la ïing pyrshah ïa ka Mawlai SC (kaba lamkhmat na ka Group-A) ha PA Sangma Stadium, Tura ha ka por 3:30 janmiet.
U manager jong katei ka kynhun u la ong ba kumba long mynta ka Khliehmawlieh kam shym la ïoh ban ïalehkai ha la ïing (home ground) kumba la leh ïa kiwei ki kynhun ba rung sha ka semi final.
Kane ka kynhun kaba la wan ha ka kyrdan ba-ar ha ka Super Division jong ka NDSA ha ka aïom ïalehkai ba la dep, ka la buh ruh ka jingkylli, “balei ka MFA ha baroh ki san tylli ki jingïalehkai (group) la pynlong ha madan Chanmari”, hynrei mynta ka pynkynriah noh sha PA Sangma Stadium da kaba ai daw ba ka madan ha Chanmari kam long. “Haba baroh san tylli ki jingïalehkai jong ka Khliehmawlieh YC ka la ïoh ban ïalehkai ha madan Chanmari, hynrei balei ha ka semi pat kam long ban ïalehkai. Hato kane ka dei ka jingñion beiñ ïa ki klob kiba na nongkyndong?”.
Kat kum ka jingpyllait khubor da ka MFA ha ka sngi Palei, la ong ba ha ka jingshisha ka madan ha Chandmari kaba ha Tura ka dei ka jaka ïalehkai na ka bynta ka Group-D bad la sakhi ïa ka jingwan tuid ki paidbah nongpeitkai. Kumta ïa ka jingïakhun semi final yn pynlong noh ha PA Sangma Stadium ha kaba yn ïadon lang ka MP jong ka Tura, ka Agatha K. Sangma kum ka kongsan.
