Shillong, Naitung 16:
Ki ‘thei ïalehkai kriket ka India ki la shah pynliem noh da 40 run hakhmat ki ‘thei ïalehkai kriket ka Bangladesh ha ka jingïakhun ïa ka One Day International (ODI) kaba nyngkong. Kane kan dei ruh ka jingshah rem kaba nyngkong eh ha ka jingïalehkai kaba 50 over pyrshah ïa ka Bangladesh.
Ki ‘thei ka India kiba la kam trai ban kawang bol nyngkong, ki la lah shisha ban ïalehkai bha, ha kaba ka Amanjot Kaur kaba la ïalehkai ka jingïalehkai kaba nyngkong eh, ka la khur haduh 4 wiket bad ai 31 run, ha kaba ka India ka la lah ban tehlakam ïa ki nongtied ka Bangladesh, kiba la lah ban kamai tang 152 run na ki 43 tylli ki over bad hap lut ki wiket.
Haba beh ïa kane ka thong, ki nongtied ka India kim shym la lah satia ban ïalehkai bha bad ha kaba kut ki la lah ban kamai tang 113 run na ki 35.5 over. Dei tang ka Deepti Sharma kaba la lah ban tied marwei haduh 20 run na ki 40 tylli ki bol.
Katba ka Marufa Akter ka la khur haduh saw wiket na ka bynta ka Bangladesh bad ban ai tang 29 run.
Ïa kane ka jingïalehkai, la hap ban pynhiar noh sha ka 44 over namar ka jingpynthut jong u slap.
