Shillong, Naitung 16:
U khlur ïalehkai phutbol ka jylla u samla Redeem Tlang u la ïasoi ïa ka kontrak kaba ar snem bad ka North East United Football Club, ïa kaba la pynthikna ha ka sngi Saitjaiñ.
U samla Tlang u la ïuh kjat nyngkong ha ka lympung Indian Super League kata ban ïalehkai na ka North East United ha u snem 2014, hadien ba la shim ram na ka Shillong Lajong Football Club ha ka rta kaba 19 snem.
U Redeem ha ki ar tylli ki samoi bad ka Shillong Lajong FC ha ka lympung I-League, u la ïasoh sha ka North East United ha u snem 2018, ha kaba u la ïalehkai ha ki ar tylli ki samoi bad ban mih madan haduh 35 sien bad khyrwit saw tylli ki kol.
Ka jingim ïalehkai jong une u rangïalehkai pdeng ka la nang ïaid shakhmat ha ka lynti kaba biang, ha kaba u la leit ban pynïasoh noh ïa lade sha ka FC Goa ha u snem 2020, ban ïakynduh biang bad ki rangïalehkai barim ka Lajong kata u Aiban Dohling bad u Phrangki Buam.
Hynrei namar ka jingdon ha kane ka club kaba heh ha Goa, u samla Redeem Tlang u la ïoh khyndiat ka jaka, bad ban ïoh ïalehkai tang 10 tylli ki jingïalehkai ha u snem 2020-21, ka snem ba ka Goa ka la pyndep ha ka kyrdan kaba hakhliehduh ha ka lympung ISL, katba u snem 2021-2022 pat ka la dei ka snem kaba sniew na ka bynta ka Goa, ha kaba u Redeem Tlang u la ïoh ban ïalehkai tang kawei ka jingïalehkai bad ha kaba la airam noh ïa une u rangïalehkai sha ka Odisha FC, ha kaba u la ïoh ïalehkai kham bun bad ruh ban nang khur ki jingjop.
Ha ka aïom kaba khatduh bad ka Goa kata ha u snem 2022-23, u samla Redeem u la ïoh midan haduh 18 sien bad ban khyrwit 3 tylli ki kol, kaba la long ruh ka snem kaba biang bha na ka bynta ka jong u hynrei ym da biang pat na ka bynta ka Goa, kaba la lah ban pyndep tang ha ka kyrdan kaba hynñiew napdeng ki 11 tylli ki kynhun, katba ka North East United FC pat ka la don ha trai duh.
“Da kaba dei na ka thaiñ shatei lam-mihngi bad ban wan phai biang sha la ïing ka long shisha kaba kyrpang bha,” la ong u samla Redeem bad bynrap “Nga la dep ban kdew ha ka por ba nga mih na ka club ha u snem 2020 ba ka North East United FC kan ïai don beit ha ka mynsiem ka jong nga. Bad mynta nga la wan phai biang sha ka jaka kaba la plie lad ïa ka jingïalehkai ka jong nga ha ka lympung ISL. Nga sngew ba nga khlem jngai satia na kane ka club. Mynta nga dang ap ban ïoh sdang noh ïa ka lynti kaba thymmai bad ngan ïaleh katba lah ban ailut na ka bynta kane ka club bad na ka bynta ki nongkyrshan.”
