Shillong, Naitung 16:
U Avinash Sable uba dei u khlur mareh ka India ha ka 3000 meter steeplechaser ha ka sngi U Blei u la ïoh rung sha ka lympung Paris Olympics ka ban long ha u snem 2024. Kane ka wan urlong hadien ba u lah pyndep ha ka kyrdan kaba hynriew ha ka lympung Silesia Diamond League.
U Sable uba dei u National Champion u la pyndep ha ka por kaba long 8 minit 11:63 sekhon, kaba long khyndiat shabar jong ka national record ka jong u kaba 8:11.20 sekhon, hynrei kane ka la pynlong pat ïa u ban lah ban ïoh rung sha ka Paris Olympics.
Hadien kane ka jingïoh rung, u Avinash mynta un ïasoh bad kiwei ki saw ngut, kata u Akshadeep Singh, Vikas Singh bad u Paramjeet Singh Bisht bad ka Priyanka Goswami bad ka Murali Sreeshankar ha ka thup ki nongïalehkai ka India kiba la ïoh rung sha ka Olympic haduh kane ka khyllipmat.
U Avinash Sable u la dep ruh ban ïoh rung sha ka lympung World Championships ka ban long hapdeng ka 19 haduh 27 tarik jong u bnai Nailar ha Budapest, Hungary.
