Shillong, Naitung 16:
Ka nongmareh ba paw jong ka India, ka Parul Chaudhary ha ka sngi U Blei, ka la jop ïa ka takma kaba ar ka jong ka, ha ka lympung ïalehkai kaba la tip kum ka Asian Athletics Championships (AAC) da kaba khur ïa ka takma rupa ha ka jingmareh kaba 5000 meter, ha ka sngi kut jong kane ka lympung.
Ka Chaudhary, kaba la jop ïa ka takma ksiar ha ka jingmareh kaba 3000 meter steeplechase kaba la long ha ka sngi Thoh-dieng, ka la lah ban pyndep ïa kane ka jingïamareh ha ka por kaba long 15 minit 52.35 sekhon ban wan ba-ar kata hadien jong ka Yuma Yamamoto (15:51.16) kaba na ka Ri Japan ha ka jingmareh 5000 meter ha ka final.
Ka Chaudhary kaba la don 28 snem ka rta ka dei kaba bat ïa ka National Record ha ka jingmareh 5000 meter kaba ka la pyndep ha ka por kaba 15:10.35.
Ha kane ka jingmareh kaba 5000 meter, ka India ka la khur ar tylli ki takma, kata hadien ba ka Ankita ka la jop ïa ka takma rnong da kaba pyndep ha ka por kaba 16:03.33.
Kham hashwa jong kane, u Kishan Kumar bad ka KM Chanda ki la lah ban ïalehkai bha ban jop ka takma rupa ha ka jingmareh 800 meter.
U Kumar u la lah ban pyndep ha ka por kaba long 1 minit 45.88 sekhon ban pyndep ha ka kyrdan kaba ar, hadien jong u Abubaker H Abdalla (1:45.53) jong ka Qatar, katba ka Chanda ka la pyndep ha ka por kaba long 2:01.58 hadien jong ka MK Dissanayaka (2:00.66) jong ka Sri Lanka.
