Shillong, Naitung 16:
Ka West Ham United ka la pynpaw ïa ka jingkwah bad thrang ban soi ïa u kapten jong ka Manchester United u Harry Maguire.
Kumba ka long mynta, ka lawei jong une u rangïalehkai dien ka England uba la 30 snem ka rta, kam shai satia ba un dang neh ha Old Trafford, hadien ba u Raphael Varane bad u Lisandro Martinez ki la long kiba hakhmat ha ka thup jong u Erik ten Hag.
Ka United ka donkam ruh ban die noh ïa ki katto katne ki rangïalehkai ban plie lad pat ïa u Ten Hag ban pynwandur ïa ka thup jong ki rangïalehkai jong u ha kane ka ïew ïadie ïathied rangïalehkai hadien ba la nangjan ban soi ïa u nongap kol ka Inter Milan u Andre Onana.
Ka kontrak jong u Maguire bad ka United kan kut noh ha u snem 2025. Une u rangïalehkai, u la wan poi ha United na Leicester City ha ka dor kaba la kot haduh £80m ha u snem 2019, hynrei mynta ka la paw ba un dei lang na ka thup ki rangïalehkai ba u Ten Hag un die noh noh lada don ka jingtyrwa kaba kham biang.
U manager jong ka West Ham u David Moyes u la kwah ban nang pynkhlaiñ ïa ka kynhun jong u hadien ka jingdie noh ïa u kapten ka kynhun u Declan Rice, kaba lah ban pynmih pisa haduh £105m.
Kumba ka paw mynta, u Moyes u la phai khmat sha u rangïalehkai pdeng ka Ajax u Edson Alvarez kum ka jingbujli ha ka jaka jong u Rice, hynrei u Maguire un long shisha uba biang ban pynkhlaiñ ïa ka bynta ba shadien khamtam hadien ba ki ar ngut ki rangïalehkai dien kata u Kurt Zouma bad u Nayed Aguerd ki la mad ki jingshitom ba jan manla ka por ha kane ka aiom kaba la lah.
