Shillong, Naitung 16:
U khlur ïalehkai badminton ka India, u Lak-shya Sen watla u la ïakhun tyngeh hynrei u la shah pynliem noh ha ka semi-final jong ka lympung US Open Badminton ha-khmat jong u lahduh ka All England Champion u Li Shi Feng jong ka China.
U Lakshya uba la khur ka takma ksiar ha ka lympung Commonwealth Games, uba la don ha ka kyrdan kaba lai ha kane ka lympung, u la shah liem noh da 17-21, 24-22, 17-21 ha ka jingïakhun pyrshah ïa u Feng ha ka jingïalehkai kaba ïakhaid bha kaba la neh haduh shi kynta 16 minit ha ka BWF Super 300 kaba la long ha ka miet sngi Saitjaiñ.
Ka jingïakhun hapdeng u Feng ba bat ïa ka kyrdan kaba 7 ha ka pyrthei bad u Lakshya uba bat ïa ka kyrdan kaba 12, ka la ïakhaid bha ha kaba sdang hapoh ka 17 minit hynrei hadien kane, u Feng u la lah ban shim kabu ïa ki jingleh bakla jong u Sen.
Hynrei na ka liang u Lakshya uba la khur ka takma rnong ha ka lympung world championships um shym la duh mynsiem satia bad ka ‘game’ kaba ar, u la ïakhun tyngeh bad ban jop syndon.
Hynrei ha ka jingïa-lehkai kaba khatduh, u Feng u la lah ban ïakhun tyngeh bad ban tam point wut wut bad da kane ka jinglah ban ïalehkai bha, watla u Lakshya u la ïakhun tyngeh, ha kaba kut, u Feng u la khur ka jingjop bad ban jop syndon ïa kane ka jingïakhun.
