Shillong, Naitung 16:
U Carlos Alcaraz u la khur ïa ka jingjop bad ka nam lahduh kaba nyngkong eh jong ka lympung Wimbledon bad ban pynkut ruh noh ïa ka jingïaid lynti jong u Novak Djokovic uba la dei u rangïalehkai tennis uba la bat bun ki nam jong kane ka lympung.
U Carlos Alcaraz ba dang 20 snem na ka ri Spain, u la lah ban ïakhun tyngeh watla na kaba sdang u la shem shitom, hynrei khlem duh mynsiem ka la pynlong ïa u ban lah syndon ban pynliem noh ïa u Djokovic uba bat ïa ka nam lahduh ha ka aïom ba la lah, da kaba jop da 1-6, 7-6, (8-6), 6-1, 3-6 bad 6-4.
Ha kaba sdang la i kumba u Djokovic un khur ïa ka jingjop kaba san sien kynthih, ka nam lahduh kaba phra jong kane ka lympung bad kaba 24 ha ka jingim ka jong u, hynrei une rangïalehkai ba la 36 snem, u la shah pynduh noh kane ka lad ha u Alcaraz, da kaba pyni ïa ka jingtbit ka jong u bad ban jop ïa ka nam lahduh kaba heh ka ban dei ruh kaba ar ha ka jingim ïalehkai ka jong u.
Lah ban pynpaw ba ka nam lahduh kaba nyngkong ba u Alcaraz u la jop, ka dei ka nam lahduh jong ka US Open ha u snem ba la lah.
U Alcaraz un dei ruh u rangïalehkai ba lai ban jop ïa ka nam lahduh jong ka Wimbledon ha ka rta kaba dang khynnah kata hadien jong u Boris Becker ha ka rta kaba 17 snem ba u la jop ha u snem 1985 bad u Bjorn Borg ha ka rta ba 20 snem ha u snem 1976.
