Shillong, Naitung 16:
Ka Arsenal ka la pynthikna ba ka la dep ban soi pura ïa u rangïalehkai pdeng ka England u Declan Rice na ka West Ham United ha ka jingsiew kaba kot sha ka £100m bynrap bad £5m kiwei ki jingsiew.
Kane ka jingpynbna na ka liang jong ka Arsenal ka la wan hadien ba une u rangïalehkai ba dang 24 snem u la pynmih ïa ka jingthoh sha ki nongkyrshan ka West Ham da kaba ong ba ka long katno kaba eh bha ban shim ïa kane ka rai ban mih noh na kane ka club.
U Rice u la soi ïa ka kontrak kaba haduh san snem kynthih bad ka Arsenal ha ka jingsoi kaba lah ban dang pynjlan sa shisnem.
“Nga la phai khmat bha sha ka Arsenal ha kine ki ar tylli ki aiom ïalehkai ba la leit bad ka lynti ha kaba ki la don,” la ong u Rice bad bynrap “Ym dei ha ka aïom kaba la lah hynrei ka aiom shwa jong kato, ha kaba ki la pyndep tang ha ka kyrdan kaba san, hynrei phi lah ban ïohi ka rukom ba la pyntreikam da u Mikel Arteta.
U Rice un dei u rangïalehkai ba lai ba ka Arsenal kan soi ha kane ka aiom, ha kaba ki la phai khmat ban lah ban khur jingjop ha kane ka aiom, kata ban lah pyndep ha ka kyrdan kaba nyngkong.
Nalor u Rice, kiwei ki ar ngut ki rangïalehkai ba la dep ban soi da ka Arsenal ki long u rangïalehkai ka Germany u Kai Havertz ba la soi na ka Chelsea ha ka dor kaba £65m bad u rangïalehkai dien ka Netherlands u Jurrien Timber na Ajax ha ka dor kaba la kot sha ka £38.5m.
Ka jinglah ka Arsenal ban ïoh soi ïa u Rice ka la dei ha ka jingtyrwa kaba lai, ha kaba ki ar tylli ki jingtyrwa ba nyngkong ki la shah kyntait, kata ba ka long hapoh ka dor kaba la buh da ka West Ham ba kot £100m.
Ka lahduh jong ka Premier League ka Manchester City ka la kynran dien noh na ka jingpyrshang ban thied ïa une u rangïalehkai hadien ka jingshah kyntait noh ka dor £90m ba ka la tyrwa.
Ka jingpynïasoh jong u Rice, kan nangai mynsiem ïa ka Arsenal ba kan lah ym tang ban ïalehkai bha hynrei ruh mynta ban beh biang sha ka thong jong ka jingjop.
