Shillong, Naitung 17:
Ka Manchester United ka la mynjur ban ïateh kular bad u rangapkol ka Inter Milan u Andre Onana.
Kat kum ki khubor la ong ba utei u rangïalehkai ka Cameroon un pynkhreh ïa ka jingshah eksamin hashwa ba yn pyndep ïa ka jingleit ïasoh sha katei ka klob kaba na Old Trafford ha ka jingsiew kaba €50 million.
Ka United ka la khmih lynti ba u Onana, u ban mih mih bujli ha ka jaka u David De Gea kum u No. 1 jong ka klob, un ïadon lang bad ka kynhun ïalehkai ka ban leit sha United States mynta ka taiew.
Ki khubor ki ïathuh ba lada u Onana u la long kum u rangïalehkai ba pura jong ka United player, yn ailad noh ïa u Dean Henderson ba un leit ïasoh pura sha ka Nottingham Forest.
U Henderson u la pynlut ïa ka por ïalehkai ha ka aïom ba la lah da kaba leit ïasoh (loan) sha ka Forest, watla la ïohi ba u la don ha Carrington ha kaba sdang ka prokram kilanmet, hynrei la khmih lynti ba un pyndep ïa ka jingleit ïasoh sha katei ka klob kaba na City Ground ha ka jingsiew kaba £20m.
U Onana, uba la ïatrei lang bad u Erik ten Hag ha ka por ba ki dangïadon lang ha ka Ajax Amsterdam, un long uba ar ïa kaba ka United ka la lah ban pyndep ïa ka jingsoi kontrak hadien ka jingwan poi u rangïalehkai shapdeng u Mason Mount naka Chelsea. U Onana un pyndap ïa ka jaka kaba thylli jong u De Gea, uba la mih noh na Old Trafford kum u rangïalehkai ba laitluid hadien 12 snem ba u la don bad kane ka klob.
