Shillong, Naitung 17:
2 ngut ki rangïalehkai chess ka Jylla hapoh ka lama jong ka Meghalaya Chess Association (M.C.A) ki la lah ban pynpaw ïa ka jingtbit na ka bynta ban wanrah burom ïa ka Jylla ha ka “5th Ayodhana International FIDE Rating Chess Tournament 2023” kaba la kut dangshen ha Guwahati, Assam.
Kine ki kynthup ïa u Barbith M. Sangma, uba dei ruh u lahduh ha ka Jylla na Garo Hills ha kaba u la wan ha ka kyrdan balai ha ka Below-18 bad u Advitiya A. G uba dei u samla pule jong ka Army Public School, Shillong ha kaba u la wan ha ka kyrdan ba nyngkong ha ka Under-07.
Kine ki ar ngut ki nongïalehkai kin ïashim bynta ruh ha ka “46th Meghalaya State A Chess Championship 2023” ka ban long ha Auditorium Hall, kaba ha Umsning, Ri-Bhoi District naduh 21 haduh 22 tarik mynta u bnai ha kaba yn pynlong da ka Ri-Bhoi District Chess Association RBDCA).
Ki saw ngut ki rangïalehkai ki ban wan ha ka thup kaba saw kin ïoh ïa ka lad ban mihkmat ia ka Jylla sha ka 60th National Chess Championship 2023 ka ban long ha Pune, Maharashtra naduh 16 haduh 26 tarik u Nailar mynta u snem.
