Shillong, Naitung 18:
Ka Brighton ka la kyntait ïa ka jingpyrshang jong ka Chelsea ban thied ha ka dor £70m na ka bynta u rangïalehkai shapdeng u Moises Caicedo.
Utei u rangïalehkai na Ecuador u la thmu ban mih noh na ka Brighton ha u Kyllalyngkot wat hapdeng ka jingthrang ka Arsenal ban soi ïa u. Na ka liang ka Brighton ka la kyntait bad u Caicedo u la hap ban soi ïa ka kontrak kaba thymmai ha u Lber ka ban kut haduh u snem 2027.
Hynrei une u rangïalehkai u dangshah phai khmat ha kiba bun ki klob jong ka Premier League, bad ka Chelsea ka la long kawei na kita kaba la thrang ban soi ïa utei u rangïalehkai ba dang 21 snem ka rta.
Ka Chelsea kan pynkhreh ban ïakhun pyrshah ïa ka Brighton ha ka sngi Saitjaiñ ha Philadelphia bad kane ka jingïakhun ka long shi bynta kum ka jingpynkhreh ïa ka Premier League.
U Caicedo u leit sha US da kaba un mih na Ecuador, katba ka kynhun ïalehkai jong ka Brighton ka la mih ha ka sngi Ba-ar.
Utei u rangïalehkai shapdeng u la pynïasoh sha ka Brighton na ka kynhun ïalehkai na Ecuador ka Independiente del Valle ha ka jingsiew kaba £4.5m ha u Rymphang jong u snem 2021, hynrei um shym la ïoh ban ïalehkai ha ka aïom ba la lah.
U Caicedo u la ïoh ban ïalehkai nyngkong eh ha ka Premier League ha u Ïaïong jong u snem 2022 bad haduh mynta u la ïoh ban ïalehkai haduh 53 sien na ka bynta ka Brighton bad thep kol ar sien.
