Shillong, Naitung 18:
U MLA ka North Shil-long Constituency, u Bah Adelbert Nongrum u la pynkup burom ïa ki san ngut ki khynnah ïalehkai karate ka Jylla kiba la khur takma dangshen ha ki lympung ïalehkai shabar Jylla.
Kine ki kynthup ïa u Damebanmerbha S. Blah bad ka Daphilahun Wah-lang (kiba la khur ïa ka takma ksiar), kumjuh u Inlumlang Skhemiew (uba la khur ïa ka takma rupa), katba u Sameban-merbha S. Blah bad u Alferius Kharsyiemïong (kiba la ïoh ban leit ïashim bynta).
Ïa kane ka jingpynkup burom la pynlong ha ka 17 tarik mynta u bnai kaba dei ka sngi rakhe kyrpang ïa ka lyngkhuh sngi khlad kaba 188 snem jong u khla wait ka ri u Tirot Sing uba long u syiem ka Hima Nong-khlaw, ha kane ka nongbah ha kaba u la sam da ki memento lem bad ka song pisa kumba T. 23 hajar tyngka.
Katei ka jingpynkup burom da utei u MLA ka long ruh ha kajuh ka por ban pynshlur bad ban ai mynsiem ïa ki khun samla ka jaitbynriew ba ha kino kino ki jingïakhun dei ban don ïa ka mynsiem ban aiti lut bad len lade.
“Kim dei ban kut noh tang shiteng namar kano kano ka jingïakhun tang shiteng por la ka long haba ki shah rem noh, hynrei ki dei ban trei shitom khnang ba ha kawei ka sngi ki lah ban wanphai da ka jingjop,” la ong u Bah Adelbert.
Haba ïadei bad ka jing-rakhe ïa katei ka sngi bakyrpang, u Bah Nong-rum u la ong, “Ban shu kynmaw tang ban buh ïa u syntiew kan nym pat long kaba biang, hynrei ngin pynkynmaw ïalade ba ngin phong bad pynkup halade ïa ka mynsiem ban ïakhun ha kino kino ki bynta la ka long ha ka jingpule, jingkilan met ha ki jingïalehkai bapher bapher bad ha kiba bun rukom khnang ba kin mih bun ki khlawait kane ka juk mynta.”
“Te kumta ngi khot lang ïa baroh kiba don ka jingkitkhlieh ban wanrah ïa ka mynsiem ka jinglong kawei ban ïakhun da ka jingmut jong ka jingïatylli ban pynïoh ban pynpoi sha kawei pat ka thong,” u la bynrap.
