Shillong, Naitung 19:
Ka Asian Cricket Council ka la pynbna ka la pyndep ïa ka jingpynbit pynbiang na ka bynta ka Asia Cup 2023, ka ban sdang naduh 30 tarik u Nailar haduh 17 tarik u Nailur.
Ha kane ka lympung kin don hynriew tylli ki kynhun, kynthup ïa ka India, Pakistan, Nepal, Afghanistan, Sri Lanka bad ka Bangladesh, ha kaba kin ïakhun ïa ka jingïa-lehkai kaba 50 over. Ïa ki jingïalehkai yn pynlong ha ki saw tylli ki jaka kiba ha Pakistan bad Sri Lanka.
Ka Pakistan kan sdang ïa ka jingïalehkai jong ka Asia Cup 2023 ha Multan ha ka 30 tarik u Nalar. Kawei ka jingïalehkai ka ban kham itynnad kan dei ka jingïakhun hapdeng ka India bad ka Pakistan ha ka jingïalehkai (group) ka ban long haka 2 tarik u Nailur ha Kandy.
Na kine ki jingïaleh-kai, tang saw tylli yn pynlong ha Pakistan, kynthup ïa ka jingïalehkai (Super Four), kaba lah ban long hapdeng ka Pakistan bad ka Bangladesh ha Lahore.
Ïa ka jingïalehkai group jong ka Asia Cup yn pynkut ha ka 5 tarik u Nailur, ha kaba yn bud sa ka Super Four ka ban sdang naduh 6 tarik.
Lada ka India bad ka Pakistan ki ïoh rung sha ka Super Four, ïa ka jingïakhun kaba ar ha ka Asia Cup 2023 yn pynlong ha Kandy ha ka 10 tarik u Nailur.
Ïa ka jingïakhun final jong kane ka lympung yn pynlong ha ka 17 tarik u Nailur ha R. Premadasa Stadium kaba ha Colombo.
Ha ki jingïalehkai group, yn pynïakhun ïa hynriew tylli ki jingïaleh -kai bad ïa kiwei pat ki hynriew tylli ki jingïalehkai kin long ha ka Super Four.
Ki ar tylli ki kynhun na kawei pa kawei ka group kin ïoh ïa ka lad ban jam sha ka Super Four, ha kaba ar tylli ki kynhun ki ban wan ha ka kyrdan ba hakhlieh na ka Super Four kin ïoh rung sha ka final.
