Jowai, Naitung 19:
Ka Lumkhangdong Kyndongtuber bad ka Da i hi Mynsngad ki la khur ia ka jingjop ha ka lympung ïalehkai 3rd Division Football Tournament na ka bynta ka 3rd Adelbert Laloo Memorial Trophy ba la pynïaid da ka West Jaiñtia District Sports Association.
Ha ka jingïakhun kaba la long ha ka sngi Balang ha madan Kiang Nangbah Stadium kaba ha Ladthadlaboh Jowai, ka Lumkhangdong Kyndongtuber ka la pynliem noh ïa ka Youth Social Welfare Pynthor da 5-0 kol.
Ha kane ka jingïakhun baroh ar ki kynhun ki la pyrshang ban ïakhun tyngeh, hynrei ka Lumkhangdong ka la ïoh ban pynkhih jar nyngkong eh lyngba u Risid Dkhar ha ka minit kaba 9.
Hadien katto katne por u Damepaia Shylla u la ïoh ban thep ar kol ha ka minit kaba 21 & 34. Ka Lumkhangdong ka la ïoh ban thep sa ar kol lyngba u Leiyoo Phawa ha ka minit kaba 29 bad u Phourki Chyrmang ha ka minit ba 70 na ka bynta ban khur syndon ïa ka jingjop.
Ha ka jingïalehkai kaba bud hapdeng ka Lumpyrtuh Mihmyntdu bad ka Madanthad Thadmuthlong ki la ïasam mar shi point hadien ba ki la iakhaid mar 2-2 kol.
U Precious Tang u la ïoh ban thep ar kol na ka bynta ka Madanthad Thadmuthlong ha ka minit kaba 7 & 46, hynrei ka Lumpyrtuh Mihmyntdu ka la lah ban pynphai kylla ar kol lyngba u Heimonmi Dkhar ha ka minit kaba 55 bad u Monlang Phawa (70+3).
Katba ka jingïakhun hapdeng ka Moodop Royal pyrshah ïa ka Riatsaliya Mihmyntdu ki la ïasam mar shi point hadien ba kin shym la lah ban thep kol haduh kaba kut ka jingïalehkai.
Ha ka jingïakhun kaba khatduh jong kane ka lympung, ka Da i hi Mynsngad ka la pynliem noh ïa ka Lumchyrmang Mihmyntdu da 2-1. Ka Da i hi Mynsngad ka la thep kol lnyngkong lyngba u Lamjingkyrmem Muksor ha ka minit kaba 14 bad u Pynskhem Mukhim (20). Hynrei ka Lumchyrmang Mihmyntdu ka la lah ban pynphai kylla shi kol da u Fredi Chyrmang (33) hashwa ban kan mad ïa ka jingshah rem.
