Jowai, Naitung 19:
Ka lympung ïalehkai jong ki khynnah shynrang kiba hapoh 17 snem rta ba tip kum ka “Independence Day Cup Under-17 Football Tournament” ba la pynïaid da ka West Jaiñtia District Sports Association (WJDSA) kan sdang naduh ka sngi Palei ha madan Kiang Nangbah Stadium kaba ha Ladthadlaboh, Jowai.
Ha kane ka lympung ki don haduh 23 tylli ki kynhun ha kaba la phiah ïa ki ha ki phra tylli ki group kiba don mar lai tylli ki kynhun.
Ha ka Pool ‘A’ ki long ka Lumchyrmang Mihmyntdu, Dongmihsngi, bad 7 Wasa. Ha ka Pool ‘B’, ki long ka Pynthor Youth Social Walfare, Mynthong bad Sohnynting. Ha ka Pool ‘C’, ki long Ladthadlaboh, Salaroh bad FAM.
Ki kynhun kiba don ha ka Pool ‘D’ ki long ka Khimusniang, Catholic Youth bad Demthring. Ha ka Pool ‘E’ ki long ka Mukhla Raij, Panaliar bad Evergreen Mukhla. Ka Dulong, Mulang Ïalong bad NSA ki la don ha ka Pool ‘F’. Ha ka Pool ‘G’ ki long ka Lumpariat bad Lutituber Ïalong. Katba ha ka Pool ‘H’ ki long ka Tpep Pale, Mooknor Thadmuthlong bad Lion.
Ki kynhun ki ban ïakhun mynta ka sngi kin long hapdeng ka Lumchyrmang Mihmyntdu pyrshah ïa ka Dongmihsngi ha ka por 1:30 nohphai sngi, katba ka Pynthor Youth Social Walfare ïa ka Mynthong ha ka por 3 baje janmiet.
