Shillong, Naitung 19:
Ka lympung ïalehkai Fourth Division (U-20) Football League 2023 ba la pynïaid da ka Shillong Sports Association ka la bteng biang ha ka sngi Balang ha kaba ka Pynthorbah SC ka la khur ïa ka jingjop.
Kane ka nam jop ka wan hadien ba la lah ban pynliem noh ïa ka Mawklot SC da 2-0 kol ha madan Third Ground, Polo.
Ha kane ka jingïakhun jong ka Group-C baroh ar ki kynhun ki la pyrshang ban ïakhun tyngeh naduh kaba sdang. Ka Pynthorbah ka la ïoh ban pynkhih jar nyngkong eh lyngba u Juvier Kharkongor ha ka minit kaba 29 na ka bynta ban tam shi kol haduh kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet ka Pynthorbah ka la pynbud biang ïa ka kol kaba ar lyngba u Lucky Warjri ha ka minit kaba 58. Watla ki rangïalehkai ka Mawklot ki la pyrshang ban pynphai, hynrei haduh kaba kut kim shym la lah ban pynurlong bad ka la mat ïa ka jingshah rem kaba nyngkong ha kane ka lympung.
Haba phai sha kawei pat ka jingïakhun kaba la long kham hashwa hapdeng ka Mawpdang SC bad ka Lummawbah SC ki la ïasam mar shi point hadien ba ki la ïakhaid mar 2-2 kol.
U Garrywell Syiem u la ïoh ban thep ar kol na ka bynta ka Mawpdang ha ka minit kaba 26 &70, katba na ka Lummawbah la thep da u Ferback Dohtdong ha ka minit kaba 12 bad u Kevin Cooper Roywe ha ka minit ba 47.
Ka jingïalehkai jong ka Group-D ha ka sngi Palei kan long hapdeng ka Mawnianglah Youth SC pyrshah ïa ka Mawkriah West SC ha ka por 2 baje, katba ka Risa Colony SC ïa ka Pommura SC ha ka por 4 baje janmiet.
