Shongdor T. 90 lak ka tiket jong ka jingïalehkai u Messi ïa ka Inter Miami

Ka jingïoh ban rah ka Argentina ia ka FIFA World Cup ha u 2022 ka la wan urlong lyngba utei u khlur ïalehkai.

Shillong, Naitung 19:

Ki paidbah riew ïeit phutbol ki la pynkhreh ban siew ïa ka bai tiket kaba shongdor $110,000 (T. 90 lak) na ka bynta ka jingïalehkai kaba nyngkong jong u Lionel Messi ha ka Major League Soccer.

Une u khlur ïalehkai ka Argen-tina un sdang ïa ka jingïalehkai kaba nyngkong eh na ka bynta ka Inter Miami ha ka sngi Thohdieng ha la ïing pyrshah ïa ka Charlotte.

Kat kum ki khubor la ong ba ki jaka shong na ka bynta ka jingïalehkai jong u Messi ka shongdor haduh $110,000 bad ïa kane ka dor jong ki tiket la buh ha ka website jong ka Vivid Seats.

La ong ba ka dor jong ka tiket ka dei ka rem duh napdeng ki klob kiba ïashim bynta ha ka Major League Soccer watla ki don kiba kham rem ha ka jong ka jingjied ki paidbah. Haba kheiñ kyllum ka long $487 abd na ka liang ki paidbah riew ïeit phutbol na Florida ki la thrang ban ïohi da la ki jong ki khmat ïa katei ka jingïakhun kaba nyngkong jong u Messi.

Utei u khlur ïalehkai barim ka Paris Saint-Germain u la soi ïa ka soskular bad ka Inter Miami CF ha ka sngi Saitjaiñ. U Messi u la mynjur ïa ka kontrak kaba ar snem shiteng ka ban kut haduh u 2026. Kat kum ka jingpynbeit la ong ba ka jingïoh ka jong u ha ka sngi snem ka long naduh $50 million haduh $60 million.

Kum ban shu pynkynmaw ba hadien ar ki ar snem ka jingïateh kular bad ka PSG ka la poi sha kaba kut, u Messi u la rai ban pynïasoh sha katei ka kynhun kaba na America. Te kumta u la khmih lynti ban jam sha kawei pat ka kyrdan ïalehkai bad ka Inter Miami bad ruh ha US. “Kane ka long ka kabu ksiar kaba phylla bad lyngba ka jingïatrei lang ngi lah ban bteng ha ka ban kyntiew shaphang. Ka thong ka long ban ïasnoh kti lang ha ka ban thep kol bad ngam sngew lah ban ap na ka bynta ban sdang noh khnang ba nga lah ban noh synñiang ha kane ka klob kaba thymmai,” la pynpaw u Messi.

U Messi u la pynpaw hakhmat ki paidbah nongkyrshan ha ka sngi U Blei ha DRV PNK Stadium kaba ha Fort Lauderdale, Florida. Ki la don da ki hajar ki paidbah nongkyrshan hapoh ka stadium kaba ha Miami kiba la risa ban ai khublei ïa utei u khlur ïalehkai.

Ka jingïoh ban rah ka Argentina ia ka FIFA World Cup ha u 2022 ka la wan urlong lyngba utei u khlur ïalehkai. U Messi u la khur ruh ïa ka khusnam Ballon d’Or haduh hynñiew sien. Ka jingleit ïalehkai u Messi kan long ka jingïarap ban kyntiew ïa ka lympung ïalehkai kaba ha North America namar ïa ka World Cup 2026 yn pynlong ha United States, Mexico, bad ha Canada.