Shillong, Naitung 19:
Ka Jamshedpur FC ka la wanrah ïa u rangïalehkai shapdeng na Serbia u Alen Stevanovic na ka bynta ban pynkhreh ïa ka Indian Super League (ISL) jong ka aïom ïalehkai 2023-24.
Kham hashwa kane ka kynhun ka la pyrshang ban soi ruh ïa u rangïalehkai barim ka Manchester United u Nemanja Matic na ka bynta ban pynkmen ïa ki paidbah nongkyrshan.
Lyngba ka jingsoi ïa u Stevanovic, ka Jamshedpur ka la khmih lynti ban nang -pynkhlaiñ ha ka bynta kaba shapdeng namar u long u rangïalehkai uba la ju mlien ban ïalehkai. U la ïalehkai ha ka Serie A, kumjuh ha ka UEFA Europa League ha ki 15 snem mynshwa. Te kumta kane ka kynhun kaba la bat teng ïa ka nam lahduh ka la khmih lynti ba u Stevanovic ba un lah ban ïalehkai bha ha kane ka aïom ka ban wan.
Utei u rangïalehkai ba la 32 snem ka rta u long uba tbit ban ïalehkai bad u ba lah ban pyni ïa ka sap ïalehkai ha ka lympung ISL.
Kumba ka paw u Stevanovic u la pynlut ïa ka por ïalehkai ha ka por ba u dangkhynnah na ka klob kaba na Serbia, ka FK Radnicki Obrenovic hashwa ba un jam sha kawei pat ka klob kiba heh ha u 2009, hadien ba u la leit pyrshang ha ka Inter Milan. Ha ka por ka bym poi pyrkhat utei u rangïa-lehkai u la shah jied hadien ba u Jose Mourinho uba pynïaid ïa katei ka klob, u la pdiang ïa u bad hadien u Mourinho u la kyntiew kyrdan ïa u na ka bynta ban ïoh ïa ka jingshah hikai bad ka kynhun (first team) ha ka aïom ïalehkai 2009/10.
U la ïoh ban ïalehkai nyngkong eh na ka bynta ka Inter Milan ha ka Serie A pyrshah ïa ka Siena, da kaba u la ïoh ban mih madan kum u rangïalehkai shongben na ka bynta u Thiago Motta ha ka minit kaba 67. Watla katta um shym la don bynta bad ka kynhun, u Stevanovic u la ïoh ban ïalehkai na ka bynta ka Inter bad ha kito ki por u la lah ban pynurlong ïa katei ka kynhun jong u Mourinho.
Hadien ba u la ïoh shibun ïa ki buit ïalehkai na utei u coach uba na Portugal, u Stevanovic u la leit ïasoh noh sha ka kynhun ïalehkai Serie B ka Torino ha u 2010. Kane ka la long ka jingplie lad ïa ka Inter ban soi sa ïa u rangïalehkai ‘dien u Simone Benedetti. Utei rangïalehkai shapdeng na Serbia u la pynlut katto katne aïom ha Torino, ha kaba u la ïoh ban ïalehkai 63 sien na ka bynta katei ka klob bad u la lah ban thep 5 kol bad ïarap pynbuh hynñiew sien.
