Shillong, Naitung 20:
Ka Arsenal ka la lah ban pyni ïa ka jingkhlaiñ bor da kaba lah pynliem haduh 5-0 kol pyrshah ïa ka Major League Soccer (MLS) All-Star ha ka jingïalehkai paralok kaba la long ha Audi Field ha ka Sngi Balang.
Ha kane ka jingïakhun u Declan Rice u la ïoh ban mih madan ha ka sien kaba nyngkong eh ïa ka Arsenal. Katba u Kai Havertz u la ïoh ban thep ïa ka kol kaba nyngkong eh hadien ba u la mih noh na katei ka kynhun kaba na London, ka Chelsea ha u bnai ba la dep.
U Rice, uba la bat ïa ka rekod ban soi ïa ka kontrak hadien ba u la mih noh na ka West Ham United, u la ïoh ban mih madan ha ka minit kaba 65. Une u rangïalehkai u la long uba rem dor na England hadien ba u la soi ïa ka kontrak ha ka jingsiew kaba £105 million ($137.5 million, 122.4 million euros).
Katba u rangïalehkai na Germany u Havertz uba la ïasoh dangshen sha ka Arsenal, u la ïoh ban mih madan ha ka kylla miet. Une u rangïalehkai u la lah ruh ban pyni ïa ka jingtbit na ka bynta ban thep kol ha ka minit kaba 89.
Ka Arsenal ka la sdang ïa kane ka jingpynkhreh jong kane ka aïom da kaba ka la lah ban pynpaw ïa ka jingtbit ha United States bad u Gabriel Jesus u la ïoh ban pynkhih jar ha ka minit kaba san jong kane ka lympung. Kane ka la wan lyngba ka jingïarap lang u Jorginho, uba la pynbud na ka bynta u Bukayo Saka bad u Jesus um shym la pynlehnohei ïa kane ka kabu ksiar.
Watla hapdeng ka jingioh ïa ki kabu ksiar da ka kynhun jong ka MLS ba la la lamkhmat da u coach ka D.C. United u Wayne Rooney, hynrei u rangïalehkai barim ka Liverpool u Christian Benteke um shym la lah ban pynurlong ïa katei ka kabu ksiar hapoh ‘box’.
U Saka u la bteng kum u rangïalehkai ba kynsai na ka bynta ka Arsenal, ha kaba u la ïoh ban thep ïa ka kol kaba ar, hadien ka jingïarap lang u Leandro Trossard ha ka minit kaba 23. Une u rangïalehkai shakhmat na Belgium u la ïoh ïa ka kabu ksiar na ka bynta ban pynurlong ïa ka Arsenal ha ka ban thep kol.
Ka kynhun jong u Rooney (MLS All-Star) ka la shem jingeh ban ïoh pynphai na ka daw ka jingkhlaiñ bor ki rangïalehkai ka Arsenal. Na ka daw ka jingkum pyndei da ka kti ia ka bol da u rangïalehkai ‘dien ka St. Louis City u Tim Parker ka la pynlong ïa u Jorginho ban thep kol lyngba ka penalty bad ban pynlong ïa ka Arsenal ban thep ïa ka kol kaba ar.
Hadien ka jingmynsaw u Trossard, u Gabriel Martinelli u la ïoh ban mih bujli bad hadien katto katne por u la ïoh ban thep ïa ka kol kaba saw na ka bynta ka Arsenal. Ïa ka kol kaba khatduh la thep da u Kai Havertz hashwa ban kut artad ka jingïalehkai na ka bynta ban khur syndon ïa ka jingjop.
