Jowai, Naitung 20:
Ka Dongmihsngi bad ka Mynthong ki la khur jingjop ha ka sngi sdang jong ka lympung ïalehkai Independence Day Cup Under-17 Football Tournament ba la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthalaboh Jowai ha ka Sngi Palei.
Ha ka jingïakhun kaba nyngkong, ka Dongmihsngi ka la pynliem noh ïa ka Lumchyrmang Mihmyntdu da 2-0 kol. Ïa kine kol la thep da u Robert A. Tang ha ka minit kaba 2 bad u Modify Sutnga ha ka minit kaba 60.
Ha ka jingïakhun kaba bud, ka Mynthong ka la jop ïa ka Pynthor Youth Social Welfare da 2-0 kol. Ïa kine kol la thep da u Decently Talang ha ka minit kaba 12 bad u Batskhem Dkhar ha ka minit kaba 14.
Kane ka lympung kan bteng biang ha ka sngi Thohdieng ha kaba ka Ladthalaboh kan ïakhun pyrshah ïa ka Salaroh ha ka por 1.30 baje nohphai sngi, katba ka Khimusniang ïa ka Catholic Youth ha ka por 3 baje janmiet.
