Khur jingjop ka Mookymphad & Pateinki Sabah ha ka Third Division

Ha kane ka jingïakhun, ka Saiñdur Mihmyntdu ka la ïoh ban pynkhih jar nyngkong eh lyngba u Khlur Phawa ha ka minit kaba 12.

Jowai, Naitung 20:

Ka Mookymphad Mihmyndtu bad ka Pateinki Sabah ki la khur jingjop ha ka lympung ïalehkai Third Division Football Tournament na ka bynta ka 3rd Adelbert Laloo Memorial Trophy ba la pynïaid da ka West Jaiñtia District Sports Association (WJDSA).

       Ha ka jingïakhun kaba la long ha ka Sngi Palei ha madan Kiang Nangbah Stadium kaba ha Ladthalaboh Jowai, ka Mookymphad Mihmyntdu ka la pynliem noh ïa ka Saiñdur Mihmyntdu da 2-1 kol.

       Ha kane ka jingïakhun, ka Saiñdur Mihmyntdu ka la ïoh ban pynkhih jar nyngkong eh lyngba u Khlur Phawa ha ka minit kaba 12. Hadien shiteng kynta ka Mookymphad ka la lah ban pynphai kylla ar kol lyngba u Wailad Shylla ha ka minit kaba 31 bad u Haphilabet Ryngkhlem ha ka minit kaba 34 na ka bynta ban khur syndon ïa ka jingjop.

       Ha ka jingïakhun kaba bud, ka Pateinki Sabah ka la jop da 2-1 kol ïa ka Mupliang. Ka Mupliang la thep kol nyngkong da u Byforcestar Dhar ha ka minit kaba 35. Ka Pateinki Sabah ka la lah ban pynphai kylla lyngba u Lakhon Dhar ha ka minit kaba 53 bad kane ka kynhun ka ïoh ei sa shi kol na ka daw ka jingbakla thep hi da u rangïalehkai ka Mupliang ha ka minit kaba 58.

       Ka jingïalehkai ha ka sngi Thohdieng kan long hapdeng ka Pasyih Cultural pyrshah ïa ka Mookaswan Dongwah ha ka por 10.30 mynstep, katba ka Mukhla Umlangchor ïa ka Loompyrdi Ïongpiah ha ka por 12.00 mynsngi.