Shillong, Naitung 20:
Ka Risa Colony SC ka la khur ïa ka jingjop kaba nyngkong na ka Group-D jong ka lympung ïalehkai Fourth Division (U-20) Football League 2023, hadien ba pynliem ïa ka Pommura SC da 2-1 kol ha ka Sngi Palei ha madan Polo.
Kane ka nam jop ka la wan urlong lyngba u Balajied khynriem bad u Perterson Lamare na ka bynta ban pynlong ïa katei ka kynhun ban khur ïa ki lai dor-thong (point).
Ha kane ka jingïakhun ka Pommura ka la ïoh ban pynkhih jar nyngkong tang mar ïasdang ka jingïalehkai lyngba u Andystar Kharsati ha ka minit kaba 4. Tang hadien lai minit jong ka jingïalehkai, ka Risa Colony ka la lah ban pynphai kylla lyngba u Balajied Khyriem na ka bynta ban ïakhaid mar shi kol haduh kaba kut jong ka kylla step.
Ka Risa Colony ka la ïoh ban pynbud biang sa shi kol ha ka kylla miet lyngba u Perterson Lamare ha ka minit kaba 61 na ka bynta ban pynlong ïa kane ka kynhun ban khur syndon ïa ka jingjop.
Haba phai sha kawei pat ka jingïakhun kaba la long kham hashwa hapdeng ka Mawnianglah Youth SC bad ka Mawkriah West SC ki la ïasam mar shi dor-thong (point) hadien ba ïakhaid mar 1-1 kol.
Ka Mawkriah West ka la pynkhih jar nyngkong eh lyngba u Laurence J. Nongbri ha ka minit kaba 15, hynrei ka Mawnianglah Youth SC ka la lah ban pynïakhaid kylla ha ka kylla miet lyngba u Ronaldo Rani ha ka minit kaba 47.
Kane ka lympung kan bteng biang ha ka Sngi Thohdieng ha kaba ka Mawlynrei SC kan ïakhun pyrshah ïa ka Laitlulang SC ha ka por 2 baje noh phai sngi, katba ka Umrynjah SC ïa ka Lamlynti SC (Sohïong) ha ka por 4 baje janmiet.
