Shillong, Naitung 20:
Ka kynhun ’rangïalehkai ka India ka la jam sha uwei pat u mawjam ha ka jingïalehkai phutbol namar mynta ka kynti ka la jam sha ka kyrdan ba 99 ha ka pyrthei. Kane ka long kat kum ka jingpyllait da ka FIFA ïa ki kyrdan ki ri ka pyrthei ha ka Sngi Palei.
Dangshen, ka India ka la jam sha ka kyrdan ba 100 hadien ki san snem. Kane ka kynhun ka la lah ban jam sa shi kyrdan hadien ba khur ïa ka nam lahduh ha ka SAFF Championship.
Kane ka jingïoh ban bat ïa katei ka kyrdan (99) ha ka pyrthei, ka la pynlong ruh ba kan bat ïa ka kyrdan ba 18 napdeng ki kynhun ha ka dewbah Asia bad ka la lah ruh ban pynthikna ban don ha ka pot 2 jong ka FIFA World Cup 2026 Qualifiers (AFC).
Kane ka jingïoh ïa katei ka kyrdan jong ka pot 2 ka long ba ka la don ka kyrdan ba kham hapoh, bad kumta kan ïaleh katba lah ban kiar na ki phra napdeng ki 17 tylli kiba don ha ka kyrdan ba kham heh jong ka dewbah Asia ha katei ka lympung ïaknieh.
Kane ka mut ba ka India ka la don ha ka thup kaba kham biang, kaba don ïa ki kynhun kiba kham hapoh. Kane ka long ka kabu ksiar ïa ka India ban ïoh rung sha ka top 2, bad ban jam sha kawei pat ka kyrdan.
Kumba ka paw ka India ka don ïa ka jingangnud ha ki katto katne ki taïew ba la dep. Ym tang ba kane ka kynhun ka la khur ïa ka nam lahduh ar sien kynthih, hynrei ka la lah ruh ban pynpaw ïa ka jingtbit pyrshah ïa ki kynhun kiba khlaiñ bor.
Kane ka kynhun ïalehkai ka ri ka la lah ban ïalehkai bha ha kane ka aïom bad ka la lah ban pynpaw ïa ka jingkhlaiñ bor kum ka kynhun hi baroh kawei.
U Igor Stimac u la pyrshang ban pynkhlaiñ bha ïa ka kynhun (starting XI) ha kaba ym lah ban tip ba ka India ka lah ban long ka kynhun kaba khlaiñ bor ha ka AFC Asian Cup, lane ban ïoh rung sha ka World Cup ha u 2026. Hynrei, halor kane ka bynta ka dang don hapdeng ka jingartatien la kan lah ne em ban pynurlong ïa ki jingangnud jong ki paidbah nongkyrshan.
