Jowai, Naitung 20:
Ka West Jaiñtia District Sports Association (WJDSA) ka la pynbna ban kan sdang da ka lympung ïalehkai kaba tip kum (L) Kesilroy Pala Invitation Football Knockout Tournament 2023.
U Hony General Secretary ka WJDSA u la pyntip ba ha kane ka lympung ki kynhun ki lah ban pynrung kyrteng haduh 25 ngut ki rangïalehkai bad kine kin neh haduh ba kut ka lympung. Ka bai rung ha kane ka lympung ka long T.5000 bad ka khusnam ka long T. 5 lak ïa ka lahduh bad T.2 lak ïa kaba wan ba-ar ryngkat ki trophy.
Ha kane ka lympung baroh phra tylli ki kynhun ïalehkai ha ka Super Division, Dorbar Shnong, Football Club, Academy, kiba ïasoh bad ka WJDSA ki lah ban ïashim bynta.
Nalor kata, ki District Sports Association, Sub Division Block Sports Association kiba na Rilum Jaiñtia bad kiba la ïoh rung ha ka MSL na Jaiñtia Hills ruh ki lah ban shim bynta. Ka tarik ban pynpoi ïa ki entry kan long ha ka 5 tarik Nailar ha u Hony. General Secretary WJDSA.
Baroh ki kynhun kin long tang 32 tylli bad ki dei ban wan ai jingtip shwa ïa ka por ba la buh. Ïa ki jingtip ba kham bniah ki lah ban phone ha kine number 9485432298 & 9612402753.
