Shillong, Naitung 21:
U Myntri Rangbah ka Jylla, Conrad K Sangma um shym la pynpaw eiei shaphang ka Shillong Lajong F.C halor ka jingïoh ïa ka lad ban ïashim bynta ha ka Durand Cup mynta u snem.
Ka jingïoh rung ka Lajong sha katei ka lympung ka wan hadien ba ka lah ban wanphai biang sha ka I-League mynta u snem naduh ba la shah pynhiar kyrdan ha ka aïom ïalehkai 2018-19.
Ha ka jingïalang kaba la long ha ka Sngi Thohdieng ha State Convention Centre, Shillong, u Conrad u la pynbna paidbah ban pynlong ïa ka Durand Cup ha u snem 2024 ha kane ka nongbah hadien ba kam shym la lah ban pynurlong na ka daw ka jingbym lah ban pyndep pura ïa ka JN Stadium kaba ha Polo. Ha kane ka sngi u Sangma u la pyllait paidbah ruh ïa ki trophy jong kane ka lympung kaba 132.
Ha katei ka jingïalang ba la pynlong da ka tnat ïalehkai jong ka Sorkar Jylla bad ka Eastern Command jong ka kynhun shipai ka ri, ki dkhot ka Shillong Lajong kiba kynthup naduh u Managing Director u Bah Larsing Ming Sawyan, ki coach lem bad ki rangïalehkai ki la ïadon lang, hynrei kaba phylla ka long ba u Myntri Rangbah um shym la kren eiei wat tang shi kyntien ruh halor ka jingïoh ban ïashim bynta ha katei ka lympung.
Kumba ka paw ka Lajong ka la don ha ka Group-D ha kaba kan ïakhun pyrshah ïa ka Downtown Hero FC lem bad ïa ki ar tylli ki kynhun ïalehkai jong ka Indian Super League, kita ka NorthEast United FC bad ka FC Goa. Kine ki kynhun kin ïakhun ha Indira Gandhi Athletic Stadium kaba ha Guwahati.
Haba ai jingkren ha katei ka sngi u Conrad u la pynpaw ba ka Meghalaya ka long kaba paw bha ha ki jingïalehkai phutbol ha kaba ki la mih shibun ki rangïalehkai phutbol kiba la ïoh ïa ka lad ban mihkhmat ïa ka ri India, kumjuh ki kynhun ïalehkai ka Jylla ki la lah ban ïalehkai bha ha ki lympung ïalehkai hapoh ka ri. Dangshen, ka kynhun ïalehkai ka Jylla ka la rung sha ka final ha ka Santosh Trophy bad kane ka pyni ïa ka jingïai kiew ka Jylla ha ka jingïalehkai phutbol na uwei u snem shwa uwei pat.
Kum ban shu pynkynmaw, dangshen, ki bor pynïaid jong ka kynhun shipai ki la pynbna ban pynlong ïa ka Durand Cup mynta u snem ha ki saw tylli ki jaka kiba kynthup ïa ka Shillong, Hynrei, na ka jingbym lah ban pyndep pura ïa ka JN Stadium ka la pynlong ban duh noh ïa kane ka lad mynta u snem. Kumta la khmih lynti ba kan ïoh ban pynlong noh ha u snem ban wan.
