Shillong, Naitung 21:
Ka jingïakhun semi final jong ka lympung ïalehkai Women’s League 2023 ba la pynïaid da ka Shillong Sports Association kan long ha ka Sngi Saitjaiñ ha SSA Stadium kaba ha First Ground, Polo.
Ka Laitkor SC kaba la wan ba-ar ha u snem ba la dep kan ïakhun pyrshah ïa ka Lumparing SC ha ka por 2 baje noh phai sngi. Ka Mawlai kaba long ka lahduh jong u snem ba la dep kan ïakhun pyrshah ïa ka PFR Football Academy ha ka por 4 baje janmiet bad ïa ki tiket lah ban ïoh na katei ka jaka.
Kumba ka paw ka Lumparing, Mawlai bad ka Laitkor ki la long ki kynhun kiba khlem pat shah rem ha ki jingïalehkai group, katba ka PFR ka la shah rem shisien.
Ka Laitkor ka la long ka kynhun kaba la khur jingjop baroh san sien ïakhun ha kane ka aïom bad ka la shah thep tang shi kol. Katba ka Mawlai bad Lumparing ki la jop saw sien bad ïakhaid mar shisien.
